Սան Պաուլու քաղաքում զինված հանցագործը, որը պատանդ էր վերցրել սրճարանի այցելուներին, հանձնվել է Բրազիլիայի իշխանություններին: Այս մասին իր կայքում հայտնել է Estado de San Paulo թերթը:
Թերթի տվյալներով ոչ ոք չի տուժել, սակայն պատանդները ուժեղ սթրես են ապրել, նրանց հետ հոգեբաններ են աշխատելու: Հանցագործը 29-ամյա Տիագու Ռոբերտ Գեդես դի Օլիվեյրան է, որը ավելի վաղ բազմիցս դատապարտված է եղել, հայտնում է ՏԱՍՍ-ը:
Հիշեցնենք, որ միջադեպը Սան Պաուլուի արեւմտյան թաղամասում կատարվել էր այն բանից հետո, երբ մի քանի գողեր հարձակվել էին հարեւանությամբ գտնվող խանութի վրա: Ոստիկանությունը օպերատիվ արձագանքել էր կատարվածին, փոխհրաձգություն էր սկսվել: Հինգ ավազակներին հաջողվել է փախուստի դիմել, իսկ նրանցից մեկը, որը մեկուսացվել էր հանցակիցներից, ներխուժել էր սրճարան ու պատանդ վերցրել սրճարանի աշխատողներին ու այցելուներին, ընդհանուր առմամբ հինգ մարդու:
