«Բարգավաճ Հայաստան» կուսակցության քաղաքական խորհուրդը հայտարարություն է տարածել:
Հայտարարությունը ներկայացնում ենք ձեր ուշադրությանը.
«Այն, ինչ տեղի ունեցավ հուլիսի 29-ին, անընդունելի եւ խստորեն դատապարտելի է: «Բարգավաճ Հայաստան» կուսակցությունը քանիցս հանդես է եկել հորդորով ՝ ստեղծված իրավիճակը հանգուցալուծել բացառապես փոխզիջումների եւ երկխոսության ճանապարհով: «Բարգավաճ Հայաստան»-ը խստորեն դատապարտում է իրենց մասնագիտական պարտականությունը կատարող լրագրողների եւ անզեն քաղաքացիների հանդեպ իրավապահների կողմից կիրառված ՝ ոչ համարժեք ուժը եւ կոչ անում անհապաղ պատժել մեղավորներին: Այո՛, մեր երկրում կան բազմաթիվ համակարգային լրջագույն խնդիրներ, որոնք օր առաջ հրատապ լուծում են պահանջում:
Սակայն, բոլոր խնդիրները պետք է լուծվեն բացառապես իրավական դաշտում ՝ երկխոսության եւ փոխզիջումների ճանապարհով: Մեկ բան հստակ է ՝ զիջում չի նշանակում պարտություն. պարտվողներ եւ հաղթողներ չեն լինելու. խաղաղ հանգուցալուծում չգտնելու դեպքում պարտվելու ենք բոլորս եւ առաջին հերթին ՝ Հայաստանի Հանրապետությունը: Կրկին կոչ ենք անում կողմերին ՝ րոպե առաջ գնալ երկխոսության եւ պատրաստ լինել զիջումների, ձեռնպահ մնալ բռնության կոչերից եւ ուժի կիրառումից: Ստեղծված իրավիճակից միակ ելքը երկխոսությունն ու փոխզիջումներն են: Այլ ելքեր չկան եւ չպետք է լինեն: Դիմում ենք բոլոր քաղաքական ուժերին ՝ մեկտեղել ջանքերը խաղաղ հանգուցալուծման ելքեր գտնելու համար: «Բարգավաճ Հայաստան» կուսակցությունն իր խորին ցավակցությունն է հայտնում այսօր դիպուկահարի կրակոցից սպանված Յուրա Տեփանոսյանի ընտանիքին»: