ՊՊԾ գնդի ներսում մնացած երկու բուժաշխատողները դուրս են եկել ՊՊԾ տարածքից: Այս մասին այսօր` հուլիսի 31-ին, NEWS.am-ի հետ զրույցում ասաց ՀՀ առողջապահության նախարարության մամուլի խոսնակ Անահիտ Հայթայանը:
Նշենք, որ այսօր՝ հուլիսի 31-ի առավոտյան «Սասնա ծռերի» անդամ Վարուժան Ավետիսյանը 1in.am լրատվականի հետ զրույցում նշել է, որ իրենք պատանդի կարգավիճակում չեն պահել բժիշկներին, նրանց նկատմամբ հսկողություն չի եղել եւ թույլատրել են ցանկացած պահին հեռանալ. «Երեկ մեր ժամապահը նկատեց, որ վերջում մնացած երկու բժիշկներն էլ իրենց կամքով հեռացան: Մենք ասել էինք՝ ձեր խղճին է՝ կմնաք, թե ոչ, որոշեցին գնան. Աստված իրենց հետ: Նրանք այստեղ հատուկ հսկողության տակ չեն եղել»,- ասել է Ավետիսյանը:
Անահիտ Հայթայանը Վարուժան Ավետիսյանի ասածները չցանկացավ մեկնաբանել:
Հիշեցնենք, որ բուժաշխատողներն արդեն չորրորդ օրը մնում էին ՊՊԾ գնդի ներսում: Ավելի վաղ երկուսը դուրս էին եկել գնդի տարածքից: