Եգիպտոսի խորհրդարանը լրջորեն քննարկում է այդ հարցը (Հայոց ցեղասպանության ճանաչման, խմբ.): Այդ մասին NEWS.am-ի հետ զրույցում հայտնել է Հայաստանում Եգիպտոսի Արաբական Հանրապետության Արտակարգ եւ լիազոր դեսպան Թարեք Մաատին:
Ներկայումս, նրա խոսքով, Եգիպտոսի կառավարությունն առայժմ այդ հարցի վերաբերյալ որոշում չի կայացրել: «Բայց Եգիպտոսի խորհրդարանը, որը երկրի նոր Սահմանադրության համաձայն, շատ լայն լիազորություններով է օժտված, լրջորեն քննարկում է այդ հարցը: Հաջորդ օրերի ընթացքում մենք կտեսնենք, թե ինչ որոշում կընդունվի: Որպես Հայաստանում Եգիպտոսի դեսպան, ձեր երկրին լավագույնն եմ մաղթում», - հավելել է Թարեք Մաատին:
Հիշեցնենք, որ եգիպտացի պատգամավոր Մուստաֆա Բաքրին խորհրդարանին եւ կառավարությանը կոչ է արել ճանաչել Հայոց ցեղասպանությունը: Նա եւ 336 պատգամավոր խորհրդարանին կոչ են արել հավանություն տալ 1915 թվականին Օսմանյան կառավարության ձեռքով 1,5 մլն հայի կոտորածը Հայոց ցեղասպանություն կոչելու օգտին բանաձեւի ընդունման նախագծին:
