Ոստիկանապետ Վլադիմիր Գասպարյանի հրամանով այսօր՝ օգոստոսի 4-ի առավոտյան պաշտոնանկ է արվել ոստիկանության Նոր Նորքի բաժնի ղեկավար Արմեն Վաթյանը։ NEWS.am-ի այս տեղեկությունը հաստատեցին ոստիկանության լրատվական ծառայությունից։ Մեր այն հարցին, թե արդյոք դա կապված է հուլիսի 19-ին Սարի թաղում տեղի ունեցած դեպքերի հետ, քանի որ Վաթյանը այդ պահին գտնվում էր դեպքի վայրում, լրատվական ծառայությունից չհերքեցին, սակայն այլ մանրամասներ չհայտնեցին։
Մեզ հասած տեղեկություններով Վաթյանի հեռացումը կապված է հուլիսի 19-ին Սարի թաղում տեղի ունեցած դեպքերի հետ։ Բանն այն է, որ նա եղել էտվյալ տարածքի պատասխանատուն, ոստիկանների ու Սարի թաղի բնակիչների միջեւ բախումների ժամանակ դեպքի վայրում է եղել։
Նշենք, որ ոստիկանները խոչընդոտել էին նաեւ լրագրողի աշխատանքը, սակայն Վաթյանը լինելով տարածքի պատասխանատու որեւէ քայլ չէր ձեռնարկել։
Հիշեցնենք, որ հուլիսի 19-ին տեղի ունեցածը տեսագրել էր «Լրագիր» կայքի լրագրող Թեհմինե Ենոքյանը։
