Ենթադրյալ ահաբեկիչներից առնվազն հինգը, որոնք Փարիզի եւ Բրյուսելի գրոհների մասնակից են, պետությունից որպես սոցիալական օգնություն ստացել են ավելի քան 50 հազար եվրո, որով ֆինանսավորել են այդ երկրներում իրենց կեցությունը: Այսպիսի հետեւության են հանգել Բելգիայի ոստիկանները, փոխանցում է The Wall Street Journal-ը:
Փարիզյան ահաբեկչությունների ենթադրյալ կազմակերպիչ Սալահ Աբդեսլամը, որը մարոկկոյական ծագմամբ Ֆրանսիայի քաղաքացի է, Փարիզում 2015-ի նոյեմբերի 13-ի ահաբեկչական գրոհից միայն երեք շաբաթ առաջ է դադարել գործազրկության նպաստ ստանալ: Ընդհանուր առմամբ, նրան փոխանցվել է 19 հազար եվրոյի չափով գումար, պարբերականին հայտնել են քաջատեղյակ աղբյուրները: Ըստ որում՝ նպաստ ստանալու ժամանակ նա եղել է բարի կառավարիչ եւ նույնիսկ համասեփականատեր, որը օրենքի համաձայն նրան զրկում էր ֆինանսական օժանդակությունից:
Բելգիայի հետախուզության ստորաբաժանման ղեկավարը նշել է, որ Ֆիլիպ դե Քոսթերի ֆինանսական հանցագործությունների հետաքննությամբ քննիչները ապացույցներ չեն հայտնաբերել, որ ենթադրյալ ահաբեկիչների ստացած դրամական միջոցները անմիջաբար ծախսվել են ահաբեկչական գրոհները կազմակերպելու համար: Այդուհանդերձ, սոցիալական ապահովության շնորհիվ նրանք գոյատեւելու եւ «իրենց ահաբեկչական ակտիվությունն անուղղակիորեն ապահովելու» միջոցներ են ունեցել, եզրափակել է նա:
