Եվրոպայի խորհրդում (ԵԽ) ՀՀ մշտական ներկայացուցիչ Պարույր Հովհաննիսյանն այսօր՝ օգոստոսի 5-ին իր հավատարմագրերն է հանձնել ԵԽ գլխավոր քարտուղար Թորբյորն Յագլանդին:
ԱԳՆ-ից NEWS.am-ին հայտնում են, որ պաշտոնական արարողությանը հետեւած զրույցի ընթացքում ՀՀ մշտական ներկայացուցիչ Պարույր Հովհաննիսյանն ընդգծեց ԵԽ-ին Հայաստանի անդամակցության 15 տարիների ընթացքում մեր երկրում ժողովրդավարության, մարդու իրավունքների եւ օրենքի գերակայության շարունակական ամրապնդման գործում կազմակերպության արժեքավոր դերակատարությունը: Պարույր Հովհաննիսյանը վերահաստատեց Եվրոպայի խորհրդի եւ կազմակերպության փորձագիտական եւ խորհրդատվական մարմինների հետ սերտ համագործակցությունն այսուհետ եւս շարունակելու ՀՀ իշխանությունների վճռականությունը` ի նպաստ սահմանադրական բարեփոխումների լույսի ներքո Հայաստանում ժողովրդավարական հաստատությունների եւ գործընթացների հետագա արմատավորման:
Եվրոպայի խորհրդի գլխավոր քարտուղար Թորբյորն Յագլանդը, ողջունելով Հայաստանի նորանշանակ մշտական ներկայացուցչին, նշեց, որ Հայաստանը, որպես կազմակերպության ակտիվ անդամ, հետեւողականորեն ներգրավված է կառույցի գործընթացներում եւ ընթացիկ աշխատանքներում: Գլխավոր քարտուղարը գոհունակությամբ հիշատակեց երկկողմ արդյունավետ համագործակցությունը, ինչպես նաեւ Հայաստանում նախաձեռնվող սահմանադրական, օրենսդրական բարեփոխումների գործընթացում ԵԽ նորմերի երաշխավորման նպատակով ՀՀ իշխանությունների կողմից իրականացվող դրական քայլերը:
Հանդիպման ընթացքում զրուցակիցներն անդրադարձան տարածաշրջանային եւ միջազգային օրակարգի արդի հարցերին, ինչպես նաեւ միջազգային այլ կառույցների հետ համագործակցության ոլորտին:
