Հայաստանն Իրանի ուղղությամբ շարունակում է իր աշխատանքները, Իրանի հետ բազմաթիվ նախագծեր ունենք, որոնք կիրականացվեն: Այս մասին օգոստոսի 11-ին լրագրողներին ասել է ԱԺ փոխնախագահ, իշխող Հանրապետական կուսակցության մամուլի քարտուղար Էդուարդ Շարմազանովը՝ ի պատասխան NEWS.am-ի թղթակցի այն հարցին, թե իրանական ուղղությամբ Երեւանի քաղաքականությունը ձախողվե՞լ է՝ հաշվի առնելով Բաքվում ձեռք բերված Ադրբեջանի տարածքով իրանական գազի արտահանման վերաբերյալ պայմանավորվածությունները:
Շարմազանովի խոսքով՝ Հայաստանը պետք է շարունակի հարաբերություններ զարգացնել բոլոր հնարավոր ուղղություններով, բայց Թուրքիայի կողմից նրա շրջափակված լինելը, Աբխազիայով երկաթուղային հաղորդակցության փակ լինելը, ղարաբաղյան հակամարտությունը տնտեսական եւ ներդրումային տեսանկյունից չեն նպաստում շահավետ դիրքեր ունենալուն:
«Մենք հաղորդակցության խնդիրներ ունենք: Խնդիրը մեր մեջ չէ. մենք մեղավոր չենք, որ Թուրքիան փակել է սահմանը, մենք մեղավոր չենք, որ Ադրբեջանը մաքսիմալիստական եւ ապակառուցողական մոտեցում ունի, մենք մեղավոր չենք, որ աբխազական հատվածում երկաթուղին չի գործում: Դրանք օբյեկտիվ դժվարություններ են: Սակայն միեւնույն ժամանակ մենք հնարավորության դեպքում օգտագործում ենք ճկուն մեթոդներ, որպեսզի մեր տնտեսությունը զարգանա: Գուցե դա տեսանելի չէ, գուցե դա դեռ շատ քիչ է»,- ասել է Շարմազանովը:
Նա նշել է, որ Հայաստանից արտահանումը ավելացել է 86-90 տոկոսով: «Հայաստանի անդամակցությունը Եվրասիական տնտեսական միությանը շահավետ է երկրի համար: Անհրաժեշտ է փաստերով խոսել: Գուցե այս կամ այն խնդիրների պատճառով ակնկալվող արդյունքը չի եղել, բայց 23 տոկոսով ավելացել են այդ գծով հարկային եկամուտները, աճել է ապրանքաշրջանառությունը: Այո, սա պատասխան է այն մարդկանց, որոնք ասում են, թե Հայաստանի անդամակցությունը ԵՏՄ-ին մեզ ոչ մի բան չի տվել»,- հավելել է խորհրդարանի փոխնախագահը:
Իրանական ուղղությամբ, շարունակել է Շարմազանովը, Հայաստանը շարունակում է աշխատանքները: «Իրանի հետ բազմաթիվ նախագծեր ունենք, որոնք կիրականացվեն: Սակայն բիզնեսը երկու բան է սիրում՝ անվտանգություն եւ հաղորդակցության հնարավորություններ: Երկու ուղղություններով էլ, ոչ մեր մեղքով, առայժմ կաղում ենք: Եթե ռուս-վրացական սահմանի խնդիրը լուծվի, կարծում եմ, որ Իրան-Հայաստան-Վրաստան-Ռուսաստան երկաթուղին այս տարածաշրջանում կլինի ամենաարդյունավետը»,- ամփոփել է Էդուարդ Շարմազանովը:
