Հայաստանի տարածքում տեղակայված ռուսական ռազմական բազան Կովկասյան տարածաշրջանում որպես կայունության երաշխիք է ծառայում: «ՌԻԱ Նովոստի»-ի փոխանցմամբ՝ այս մասին լրագրողներին ասել է ՌԴ պաշտպանության փոխնախարար Անատոլի Անտոնովը:
«Ռուսական 102-րդ ռազմական բազայի գործունեությունը մեր դաշնակցային հարաբերությունների մակարդակի եւս մեկ ցուցիչ է»,- նշել է Անտոնովը՝ ընդգծելով, որ Հայաստանում ռուսական ռազմական բազայի հարցերով ռուս-հայկական միջպետական հանձնաժողովն ակտիվ աշխատում է: «Հանձնաժողովի հերթական նիստը տեղի է ունեցել Երեւանում հունիսի վերջին»,- ասել է նա:
Նրա խոսքով՝ «հաջողությամբ իրականացվում է Ռուսաստանի եւ Հայաստանի պաշտպանության նախարարների համատեղ աշխատանքի 2016-ի պլանը»: «Այն ներառում է 40-ից ավելի տարբեր միջոցառումներ, որոնցից 22-ն արդեն իրականացվել է»,- նշել է ՌԴ պաշտպանության փոխնախարարը:
Ռուսաստանի եւ Հայաստանի պաշտպանության նախարարներ Սերգեյ Շոյգուի եւ Սեյրան Օհանյանի հանդիպման ընթացքում քննարկվել է Հայաստանի զինված ուժերի համար կադրերի պատրաստման թեման: «Ներկայումս ՌԴ ՊՆ 24 բուհերում անփոխհատույց հիմքով սովորում է 203 զինծառայող: Նրանք բարձրորակ կրթություն են ստանում: Այս տարի կընդունենք եւս 211 մարդու»,- ասել է Անտոնովը:
Երկու երկրների ռազմական ղեկավարության գնահատմամբ՝ օպերատիվ եւ մարտական պատրաստության համատեղ միջոցառումների գործնական փորձը զգալի է: Այս տարի երկու երկրների զինուժի ստորաբաժանումները նորգրավված են ՀԱՊԿ խաղաղարար ուժերի «Անխախտ եղբայրություն-2016» եւ ՀԱՊԿ Օպերատիվ արձագանքման ուժերի «Փոխգործակցություն-2016» զորավարժություններին: Դրանք համապատասխանաբար տեղի կունենան Բելառուսում եւ Ռուսաստանում:
«Հայկական թիմերը արժանավայել ելույթ են ունեցել ավարտված Բանակային միջազգային խաղերում: Նրանք բարձր մասնագիտական որակներ ցուցադրեցին «Տանկային բիաթլոն», «Բանակային հետախուզության գերազանցիկներ» եւ «Դիպուկահարի սահման» մրցումներում»,- հայտարարել է Անտոնովը:
Նա հայտնել է, որ Շոյգուն Հայաստանի պաշտպանության նախարարին անձամբ է հրավիրել ԱՊՀ անդամ երկրների պաշտպանության նախարարների խորհրդի հերթական նիստին, որը տեղի կունենա նոյեմբերին Մոսկվայում, նաեւ որպես հյուր՝ «Բանակ-2016» ռազմա-տեխնիկական միջազգային ֆորումին: