Մալթայի իշխանությունները, ավելի քան մեկ մլն եվրոյի դրամական վճարների եւ ներդրումների դիմաց Եվրամիության անդամ այս պետության քաղաքացիություն տրամադրելու շրջանակում Մալթայի քաղաքացու անձնագրեր են հանձնել երրորդ աշխարհի երկրներից մոտ 700 մարդու, հայտնում է Politico-ն:
Նրա տվյալների համաձայն, 2014 թվականին գործարկված ծրագրի իրականացումը կղզի պետության բյուջեին առնվազն 200 մլն եվրոյի լրացուցիչ եկամուտ է բերել:
«Քննադատները պնդում են, որ ծրագիրը խարխլում է եվրոպական քաղաքացիության հայեցակարգը, անվտանգության առումով պոտենցիալ ռիսկեր է ստեղծում եւ «գաղտնի մուտքի» հնարավորություն է տրամադրում ռուսաստանցիներին, որոնք ձգտում են խուսափել իրենց երկրի դեմ պատժամիջոցներից», — գրում է Politico-ն:
Մալթայի քաղաքացիությունը առնվազն 166 երկիր, ԱՄՆ-ն ներառյալ, առանց վիզայի մուտքի հնարավորություն է ընձեռում: Ազգային զարգացման հիմնադրամին 650 հազար եվրո մուծելուց եւ պետական արժեթղթերի մեջ 150 հազար ներդնելուց բացի, Մալթայի քաղաքացիություն խնդրողները ծրագրի շրջանակում պարտավոր են առնվազն մեկ տարի Մալթայում նվազագույնը 350 եվրո արժողությամբ անշարժ գույք ունենալ:
Մալթայի իմիգրացիոն իշխանությունների տվյալների համաձայն, 2015 թվականին անհատ ներդրողներին մալթայական անձնագրի տրամադրման ծրագրով հայտեր են ստացվել 40 երկրի քաղաքացիներից, ներառյալ Ռուսաստանը, Ուկրաինան, Ղազախստանը, Ղրղզստանը, Թուրքմենիան եւ Տաջիկստանը: Միաժամանակ հայտերի 25 տոկոսը մերժվել է:
Մալթայի քաղաքացիություն ստանալու համար թեկնածուները պետք է քրեական անցյալ չունենան եւ հաշվառված չլինեն Միջազգային քրեական դատարանի եւ Եվրոպոլի տվյալների բազաներում:
