Գյումրիում ԲՀԿ–ի մեծ ընտրազանգված ունենալու հարցում միայն Մարտուն Գրիգորյանը չէ, որ դերակատարում է ունեցել։ Այս մասին NEWS.am–ի հետ զրույցում ասել է Գյումրիի ԲՀԿ–ական թեկնածու Վարդեւան Գրիգորյանը՝ անդրադառնալով այն կարծիքներին, որ նախկինում ԲՀԿ–ի ձայները Գյումրիում ապահովում էր Մարտուն Գրիգորյանը, որն այս անգամ ամենայն հավանականությամբ աշխատելու է ՀՀԿ–ի օգտին։
«Միայն Մարտուն Գրիգորյանը չէ, որ ունեցել է ԲՀԿ–ի քվեների մեջ ներդրում։ 2012–ի ընտրություններում Մարտուն Գրիգորյանը եւ Սամվել Բալասանյանը մեծամասնականով են առաջադրվել, ես համամասնական ցուցակով, եւ բոլորս միասին ունեցել ենք մեր ներդրումը Շիրակի մարզում, բացի Արթիկից։ Ամեն դեպքում, ես էլ եմ հաշվարկել իմ ռեսուրսը, այս գործընթացում ես պատահական մարդ չեմ, մինչեւ ես ծանրութեթեւ արած չլինեի ու խիստ վերլուծություն արած չլինեի ու չգիտենայի իմ ռեսուրսը, այս քայլին չէի գնա»,–ասել է Վարդեւան Գրիգորյանը։
Նշենք, որ Ծառուկյանի քաղաքականությունից դուրս գալուց հետո ԲՀԿ–ն լքած Սամվել Բալասանյանը եւ Վարդեւան Գրիգորյանը պակքարելու են միմյանց դեմ, իսկ ԲՀԿ խմբակցության պատգամավոր Մարտուն Գրիգորյանը նախնական տեղեկություններով՝ սատարելու է իշխանությանը։
ԲՀԿ–ն սկզբում առաջադրել էր մարզիկ Արմեն Մուրադյանին, սակայն վերջերս մտափոխվեց եւ առաջադրեց Վարդեւան Գրիգորյանի թեկնածությունը։
Վերջինս ասաց, որ չի բացառվում՝ 2017–ի խորհրդարանական ընտրություններում էլ ընդգրկվի ԲՀԿ–ի ցուցակում։