Եվրասիական տնտեսական միության (ԵվրԱզԷՍ) Մաքսային օրենսգրքի մասին պայմանագիրը նախատեսված է ստորագրել դեկտեմբերին, ուրբաթ հայտնել են Բելառուսի Պետական մաքսային կոմիտեի մամուլի ծառայությունից:
«ԵվրԱզԷՍ-ի անդամ պետությունների կառավարություններին հանձնարարված է ապահովել ԵվրԱզԷՍ-ի մաքսային օրենսգրքի վերաբերյալ նախագծի ներպետական համաձայնեցումը, ելնելով 2016-ի դեկտեմբերին Եվրասիական բարձրագույն տնտեսական կոմիտեի նիստին այն ստորագրելու անհրաժեշտությունից», — ասվում է հաղորդագրության մեջ:
Այնտեղ նշվում է, որ Եվրասիական միջկառավարական խորհուրդը պայմանագրի նախագծի եւ ներպետական պրոցեդուրաների անցկացման վերաբերյալ միջանկյալ զեկույցը կլսի հերթական նիստին, որը նախատեսված է հոկտեմբերի 28-ին:
Մամուլի ծառայության տեղեկության համաձայն, «ի տարբերություն գործող մաքսային օրենսդրության, Եվրասիական տնտեսական հանձնաժողովի օրենսգրքի նախագիծը համալիր, կոդիֆիկացված միջազգային պայմանագիր է, որի պատրաստման ընթացքում վերանայվել են նախկինում կնքված բոլոր միջազգային պայմանագրերը, որոնք կարգավորում են մաքսային իրավահարաբերությունները, վերաիմաստավորվել է գործող կարգը եւ մաքսային օպերացիաների իրականացման տեխնոլոգիաները, փոփոխվել են դրանց իրականացման ընթացքում տեղեկատվական տեխնոլոգիաների կիրառությանը մոտեցումները»:
Ընդգծվում է, որ պայմանագրի նախագիծն ամբողջությամբ հիմնված է էլեկտրոնային փաստաթղթաշրջանառության վրա (էլեկտրոնային հայտարարագրում, մաքսային հայտարարագրի ավտոմատ գրանցում, ապրանքների ավտոմատ թողարկում, «միակ պատուհանի» մեխանիզմի կիրառություն): Փաստաթղթի նախագծում որպես առանձին գլուխ ներկայացված է լիազորված տնտեսական օպերատորների ինստիտուտը, որի ներդրումը միության պետություններում «արմատապես կփոփոխի փոխհարաբերությունները մաքսային մարմինների եւ բիզնես ընկերակցությունների միջեւ, որոնք տվյալ կարգավիճակը կստանան», ասված է հաղորդագրության մեջ:
Եվրասիական տնտեսական հանձնաժողովի իրավասությունը էականորեն լրացված է` մաքսային միության գործող օրենսգրքի համեմատ, ինչը թույլ կտա ԵվրԱզԷՍ-ում միասնական ճկուն մաքսային կարգավորում ապահովել, ընդգծված է այնտեղ:
