Օգոստոսի 17-ին ՀՀ Տավուշի մարզում ԵԱՀԿ գործող նախագահի անձնական ներկայացուցչի գրասենյակի կողմից անցկացվել է հայ-ադրբեջանական սահմանագոտու հերթական դիտարկումը:
Հայկական կողմից դիտարկումն իրականացրել են ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկը եւ նրա դաշտային օգնականներ Իրժի Աբերլեն, Պետեր Սվեդբերգը:
Դիտարկումից առաջ Տավուշի մարզպետարանում կայացած բրիֆինգի ընթացքում ԵԱՀԿ պաշտոնյաներին է ներկայացրել հայ-ադրբեջանական պետական սահմանին տիրող իրավիճակը, ադրբեջանական զինուժի կողմից հրադադարի ռեժիմի խախտման դեպքերի վիճակագրությունը: Անդրադարձ է կատարվել սահմանամերձ համայնքներում բերքահավաքի անվտանգ կազմակերպման խնդիրներին: Քննարկվել եւ վերլուծվել են նաեւ ապրիլյան մարտական գործողությունների հետեւանքները, կատարված եզրահանգումները: Շնորհակալություն հայտնելով հայկական կողմին ներկայացված տվյալների համար` ԵԱՀԿ պաշտոնյաները նշել են, որ դրանք կներառվեն իրենց ամփոփիչ զեկույցներում:
Սահմանային դիտարկումն անցել է ըստ նախատեսված ժամանակացույցի: Կրակի դադարեցման ռեժիմի խախտումներ չեն արձանագրվել:
