Բալթիմոր քաղաքում Պոլո անունով շունը սատկել է՝ հրդեհի ժամանակ կրակից պաշտպանելով 8 ամսական աղջկան հայտնում է CBS News–ը:
Էրիկա Պորեմսկին՝ աղջկա մայրն ու շան տիրուհին, CBS-ին պատմել է կատարվածի մասին: Նրա խոսքով, ինքը տանից դուրս էր եկել ու մեքենային էր մոտենում, այդ պահին շրջվել է ու տեսել, որ տունը այրվում է: Նրա դուստր Վիվիանան ու Պոլո շունը ներսում էին մնացել:
«Ես փորձեցի ներս մտնել: Աղջիկս վերեւում էր, բայց ծուխն այնքան խիտ էր, որ ես չէի կարողանում ներս մտնել: Ես այսուայն կողմ էի վազում, փորձելով վերեւ բարձրանալ»,- պատմել է նա: Որոշ ժամանակ անց դեպի վերեւ ճանապարհը ամբողջովին փակ էր:
Փորձելով հասնել իր դստերը՝ Պորեմսկին ձեռքի ու դեմքի այրվածք է ստացել: Նա CBS News–ին պատմել է, որ տագնապի պատճառով այդ պահին ստացված այրվածքներին ուշադրություն չի դարձրել: Բայցեւայնպես նա ստիպված է եղել սպասել հրշեջ ծառայության աշխատակիցներին:
Պորեմսկու կարծիքով Պոլոն կարող էր աստիճաններով իջնել ու դուրս գալ շինությունից, բայց դրա փոխարեն մնացել էր 8 ամսական աղջկա հետ՝ վերեւում:
Երբ հրշեջ ծառայողները ժամանել են պատահարի վայր ու հասել երկրորդ հարկ, նրանք տեսել են, որ Պոլոն իր մարմնով փակել է Վիվիանային, որը ձեռքերի ու մարմնի այրվածք էր ստացել, բայց ողջ էր մնացել:
Պորեմսկու խոսքով շունն այդ օրը կանխազգացել էր ողբերգությունը: «Նա ամբողջ օրը իրեն տարօրինակ էր պահում: Ես նույնիսկ ասել էի ընկերոջս, որ շանը անասնաբույժի մոտ կտանեմ: Նա լացում էր ու ամենուրեք հետեւում ինձ, տագնապի զգաացողությունից նրա վարքագիծը կտրուկ փոխվել էր»,- բացատրում էր կինը:
Խոսելով շան հանդեպ իր վերաբերմունքի մասին, նա շեշտել է, որ 5-ամյա Պոլոն իր «առաջին երեխան» էր՝ մինչեւ Վիվիանայի ծնվելը:
