Ֆիլիպինների արտգործնախարար Պերֆեկտո Յասայը հայտնել է , որ երկիրը մտադիր չէ դուրս գալ ՄԱԿ-ից , չնայած միջազգային կազմակերպության հայտարարությունների մասին նախագահ Ռոդրիգո Դուտերտեի ասածին, հայտնել է «Ռոյթեր» գործակալությունը:
«Մենք նվիրված ենք ՄԱԿ-ին՝ չնայած միջազգային կազմակերպության վերաբերյալ մեր բոլոր մտահոգություններին»,- հայտնել է Յասայը մամուլի ասուլիսի ժամանակ , պարզաբանելով, որ Դուտերտեի ասածը ընդամենը արտահայտում էր «խորը հիասթափություն ու զայրույթ»:
Երկրի նախագահ Ռոդրիգո Դուտերտեն կողմ է, որ երկրում լայնածավալ պայքար մղվի թմրանյութերից կախում ունեցողների նաեւ թմրադեղեր տարածողների դեմ: Նրա պաշտոնավարության սկզբից մինչեւ հիմա՝ մոտ երկու ամսում ոստիկանական ռեյդերի շրջանակում սպանվել է 900 մարդ, որոնք կապ ունեն թմրադեղերի հետ:
Ավելի վաղ ՝ պատասխանելով հաճախացած սպանությունների մասին ՄԱԿ-ի քննադատությանը, Դուտերտեն հայտարարել էր , որ Ֆիլիպինները կարող է դուրս գալ կազմակերպության կազմից: Նա նաեւ հավելել էր , որ ՄԱԿ-ը չի կատարում իր ստանձնած գործառույթները: Բացի դրանից Դուտերտեն նշել էր ՝ Չինաստանի ու այլ երկրների հետ այլընտրանքային միջազգային կազմակերպություն ստեղծելու հնարավորությունը: