Վերաքննիչ դատարանն այսօր՝ օգոստոսի 22-ին, մերժեց «Սասնա ծռեր» խմբի անդամ Թորոս Թորոսյանի խափանման միջոց կալանավորումը փոխելու վերաբերյալ միջնորդությունը:
Լրագրողների հետ զրույցում նրա փաստաբան Լիպարիտ Սիմոնյանը նշեց, որ այս որոշման մեջ քաղաքական ենթատեքստ է տեսնում, քանի որ նախաքննական մարմնի մեղադրանքների վերաբերյալ փաստարկներն այնքան էլ հիմնավորված չեն:
«Իմ պաշտպանյալը նախկինում վիրատահության է ենթարկվել, եւ այժմ դրա հետ կապված առողջական որոշակի խնդիրներ ունի: Սակայն ընդհանուր առմամբ, նրա վիճակը բավարար է»,- ասաց փաստաբանը:
Նշենք, որ 54-ամյա Թորոս Թորոսյանն ազատամարտիկ է, մասնակցել է Արցախյան պատերազմին: Ծնունդով Արմավիրի մարզից է, սակայն ընտանիքով Արցախում է բնակվում:
Հիշեցնենք, որ Թորոս Թորոսյանին մեղադրանք է առաջադրվել Քրեական օրենսգրքի 218-րդ եւ 235-րդ հոդվածներով: Նա կալանավորված է: