Երուսաղեմի հայոց պատրիարքությունն արդեն 5 ամիս է՝ ուսումնասիրում է մամուլում տեղ գտած լուրերը, թե Դավիթ արքեպիսկոպոս Սահակյանը պատրիարքարանում պաշտոնավարելու տարիներին մանկապղծություն է կատարել:
Թե ինչու պատրիարքարանի մամլո դիվանն առ այսօր չի շտապում հայտարարությամբ հանդես գալ մանկապղծության մեղադրանքների վերաբերյալ, պարզ չէ:
NEWS.am-ի հետ զրույցում Երուսաղեմի հայոց պատրիարքարանի միաբան, ծայրագույն վարդապետ Հայր Պարետ Երեցյանը նշեց, որ իրենք ունեն փաստաբաններ, որոնք այս հարցով զբաղվում են:
«Իսրայելը դատարան ունի, եւ եթե Հրայր Եզեգելյանը դիմի դատարան, մենք հայտարարությամբ հանդես կգանք, իսկ հիմա մենք համբերատարությամբ սպասում ենք»,- ասաց Հայր Պարետը:
Հայր Պարետի խոսքով, ինքը ճանաչում է եւ Հրայր Եզեգելյանին, եւ նրա ծնողներին, եւ իրենց համար անհասկանալի է, թե ինչու է այժմ այս երիտասարդը նման մեղադրանքներ հնչեցնում. «Կարծում եմ՝ ինքն անձնական հաշիվներ ունի եւ ինքը պետք է լուսաբանի, թե ինչու է նման հայտարարություններ անում, պատրիարքարանին նման մեղադրանքներ առաջադրում: Երբ հարկ լինի, մենք հաղորդագրությամբ հանդես կգանք»:
Նշենք, որ ըստ ֆրանսիական եւ իսրայելական մամուլի՝ 1990-ական թվականներին Երուսաղեմի հայկական վանքի բարձրաստիճան հոգեւորականները բռնաբարել են մանկահասակ տղայի՝ Հրայր Եզեգելյան անունով: Նա 2013թ.-ին բողոք է ներկայացրել Դավիթ արքեպիսկոպոս Սահակյանի դեմ, որն այդ ժամանակ արդեն բնակվում էր Ֆրանսիայում:
2015թ. արքեպիսկոպոսի դեմ ներկայացվել է մեղադրանք եւ հարուցվել քրեական գործ, որը 2016-ին ուղարկվել է դատարան: Առաջիկայում սպասվում էր դատավարություն, սակայն օրեր առաջ արքեպիսկոպոսը մահացել է:
Մայր Աթոռը նույնպես այսքան ժամանակ որեւէ հայտարարություն չի արել այս հրապարակումների վերաբերյալ: Ըստ Մայր Աթոռի մամլո դիվանի՝ իրենք դիմել են Երուսաղեմի թեկին՝ պարզաբանում ստանալու համար: Պատասխանը ստանալուց հետո Մայր Աթոռը հանդես կգա հայտարարությամբ: