Հայաստանի գործարարների 89 տոկոսի համար Ռուսաստան արտահանման հիմնական խնդիրը ռուբլու անկումն է: Այս մասին է վկայում Հայաստանի տնտեսական մրցակցության պաշտպանության պետական հանձնաժողովի հետազոտությունը:

ԵՏՄ տեխնիկական կանոնակարգերից դժգոհություններն ավելի քիչ են: Հայ գործարարների շրջանում հարցվածների միայն 2 տոկոսն է նշել, որ գլխավոր խնդիրը ԵՏՄ երկրներում մաքսային եւ տեխնիկական ընթացակարգերն են:

Ռուսաստան արտահանող ձեռնարկությունները հիմնականում գործարքներ են կնքում ռուբլով (60 տոկոս դեպքերում), ինչը 2 անգամ ավելի շատ է, քան 2014-ին: Դոլարով է աշխատում հարցվածների 37 տոկոսը, եվրոյով՝ 3 տոկոսը: 2014-ից ռուբլու անկման հետ մեկտեղ ավելի շատ ձեռներեցներ անցել են ռուբլու, որպեսզի ապրանքը Ռուսաստանում դոլարի վերահաշվարկելիս չթանկանա:

ԵՏՄ մյուս երկրներ արտահանողները առքուվաճառքն իրականացնում են հիմնականում դոլարով (Ղազախստան արտահանողների 94 տոկոսը, Բելառուս արտահանողների 71 տոկոսը եւ Ղրղզստան արտահանողների 100 տոկոսը):

Ռուսաստանում տնտեսական պայմանների վատթարացումն իրենց վրա զգացել է ձեռներեցների 70 տոկոսը: 2014-ի հետ համեմատած՝ նրանցից 32 տոկոսի մոտ ապրաքներն էժանացել են, 30 տոկոսը երկարաձգել է վճարման ժամկետները, իսկ 8 տոկոսը բարձրցրել են առաջատար (promotion) ապրանքների համար վճարը: