«Սասնա ծռեր» խմբի անդամ, անազատության մեջ գտնվող Արամ Մանուկյանի առողջական վիճակը շարունակում է մնալ ծանր: Այս մասին այսօր՝ օգոստոսի 23-ին, լրագրողների հետ զրույցում ասաց նրա փաստաբան Ինեսսա Պետրոսյանը: Նա նշեց, որ Արամի խափանման միջոց կալանքը փոխելու վերաբերյալ բողոքի քննությանը նրան «Դատապարտյալների հիվանդանոցից» դատարան են տեղափոխել «Շտապօգնության» մեքենայով՝ պատգարակի վրա:

«Արամը  գամված է անկողնում, ինքնուրույն տեղաշարժվելու որեւէ հնարավորություն չունի: Արամ Մանուկյանը ելույթ ունեցավ դատարանում, նշեց, որ ինքն ընդամենը փորձել է օգնել հայրիկին եւ իրավապահներն իրեն վնասազերծելու որեւէ խնդիր չեն ունեցել»:

Նշենք, որ Արամ Մանուկյանի բողոքի վերաբերյալ Վերաքննիչ դատարանի որոշումը կհրապարակվի այսօր:

Արամ Մանուկյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասով, որը սահմանում է շենքեր, շինություններ, տրանսպորտի, հաղորդակցության կամ կապի միջոցներ զավթելը և 235-րդ հոդվածով` ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:

Հիշեցնենք, որ Արամ Պավլիկ Մանուկյանի որդին է, նրանք  ոտքերի հատվածում հրազենային վիրավորում էին ստացել ՊՊԾ գնդում տեղի ունեցած փոխհրաձգության հետեւանքով։

Լուսանկարները՝ photolure.am-ի