Վերաքննիչ դատարանն այսօր՝ օգոստոսի 23-ին, մերժեց «Սասնա ծռեր» խմբի անդամ, անազատության մեջ գտնվող Արամ Մանուկյանի խափանման միջոց կալանքը փոխելու վերաբերյալ բողոքը: Այս մասին լրագրողների հետ զրույցում ասաց նրա փաստաբան Ինեսսա Պետրոսյանը:
Նշենք, որ Արամին «Դատապարտյալների հիվանդանոցից» դատարան են տեղափոխել «Շտապօգնության» մեքենայով՝ պատգարակի վրա:
Արամ Մանուկյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասով, որը սահմանում է շենքեր, շինություններ, տրանսպորտի, հաղորդակցության կամ կապի միջոցներ զավթելը և 235-րդ հոդվածով` ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:
Հիշեցնենք, որ Արամ Պավլիկ Մանուկյանի որդին է, նրանք ոտքերի հատվածում հրազենային վիրավորում էին ստացել ՊՊԾ գնդում տեղի ունեցած փոխհրաձգության հետեւանքով։
Լուսանկարները՝ photolure.am-ի