Հավաքական անվտանգության պայմանագրի կազմակերպության (ՀԱՊԿ) ստորաբաժանումները կարող են ներգրավվել ՄԱԿ խաղաղարար առաքելություններին, հայտնել է ՀԱՊԿ գլխավոր քարտուղարի տեղակալ Վալերի Սեմերիկովը:
«Առաջին անգամ ՀԱՊԿ խաղաղապահ հավաքական ուժերը կստանան ՄԱԿ Անվտանգության խորհրդի մանդատ եւ ՄԱԿ առաքելությունների փոխգործակցությամբ կներգրավվեն ճգնաժամային տարածաշրջանում: Բացառված չէ, որ ՀԱՊԿ ստորաբաժանումները կներգրավվեն մոտ ժամանակներս»,- ըստ «Բելտա»-ի՝ ասել է Սեմերիկովը:
Կազմակերպության գլխավոր քարտուղարի տեղակալը նշել է, որ «այժմ ՀԱՊԿ ձեւաչափով մշտական պատրաստականության ոստիկանական խաղաղարար ստորաբաժանումներ են ձեւավորվում, որոնք պատրաստ կլինեն ՄԱԿ ստանդարտներին համապատասխան հանձնարարություններ կատարել»: Գործունեության այս ուղղությունը կնպաստի ընդհանրապես ՀԱՊԿ հեղինակության բարձրացմանը եւ մասնավորապես՝ կազմակերպության բոլոր անդամ երկրների: