Խոսքը գնում է թուրքական կողմի նախօրոք պլանավորած PR ակցիայի մասին, որը շատ կասկածելի նպատակներ է հետապնդում: Այս մասին NEWS.am-ին հայտնել են Հայաստանում ՌԴ Անվտանգության դաշնային ծառայության (ԱԴԾ) սահմանապահ վարչության մամուլի ծառայությունում, մեկնաբանելով մի քանի թուրք քաղաքական գործիչների կողմից Ախուրյան գետի մոտ հայ-թուրքական սահմանը ապօրինի հատելու տեղեկությունը:

Սահմանապահ վարչությունում հայտնել են, որ թուրք քաղաքական գործիչների հայտարարություններում եւ թուրքական որոշ լրատվամիջոցների  հրապարակումներում առկա է հասկացությունների խեղաթյուրում: «Թեեւ «Հզոր Թուրքիա» կուսակցության գործիչները խոսում են հայ-թուրքական հարաբերությունների նորմալացման համատեքստում իրենց բարի մտադրությունների մասին, բայց ոտնահարում են իրենց իսկ երկրի օրենսդրությունը: Իսկ քրեական հանցագործություն կատարելով եւ պետական սահմանը խախտելով, բարի մտադրություններ իրականացնել հնարավոր չէ»,- ասել են մամուլի ծառայությունում:

Սահմանապահ ծառայությունից նշել են նաեւ, որ հետեւելով թուրքական մամուլի հրապարակումներին, հայ-թուրքական սահմանի այդ տեղանքում իրենք լրացուցիչ հետազոտություն են իրականացվել. «Այդ հետազոտության արդյունքները միանշանակ ցույց տվեցին, որ թուրքական լրատվամիջոցների ֆոտոսեսիան արվել է սահմանի թուրքական կողմում` Անիի ավերակների շրջանում»:

Հայաստանում ՌԴ ԱԴԾ սահմանապահ վարչությունը NEWS.am-ին է փոխանցել մի շարք լուսանկարներ, որոնք նպատակ ունեն ապացուցել, որ «Հզոր Թուրքիա» կուսակցության անդամների հայտարարությունները, թե իրենք հատել են պետական սահմանը, իրականությանը չեն համապատասխանում:

Առաջին երեք լուսանկարներում հստակ երեւում է, որ մետաղե ցանցը գտնվում է գետի այն կողմում, այսինքն Թուրքիայի տարածքում (այդ հատվածում պետական սահմանը հենց գետն է): Հենց այդ ցանցն էլ թուրք գործիչներն անցել են (լուսանկար 4): Ավելին, սահմանի այդ հատվածի լուսանկարներում երեւում են հին հայկական մայրաքաղաք Անիի ավերակները (ներկայումս գտնվում է Թուրքիայի տարածքում): Ավերակները մետաղական ցանցի հետին պլանում են, որն ամբողջությամբ գտնվում է թուրքական կողմում: Ինչ վերաբերում է թուրքական լրատվամիջոցներում տարածված լուսանկարներին (լուսանկար 5), որտեղ «Հզոր Թուրքիայի» ներկայացուցիչներն, իբր, անցել են գետը, ռուս սահմանապահները պնդում են, որ այդ հատվածում գետի խորությունը 1,5 մետրից ավելի է, ինչն ապացուցում է, որ ոչ ոք գետը չի լողացել, այն էլ կոստյումներով եւ լուսանկարն էլ արվել է Թուրքիայի կողմում:

.