«Սասնա ծռեր» խմբին օժանդակելու մեղադրանքով կալանավորված ազատամարտիկ Մհեր Մազմանյանի 6 անչափահաս երեխաները բարերարների շնորհիվ արդեն տանիք ունեն։
Մհեր Մազմանյանի պաշտպան Նիկոլայ Բաղդասարյանը NEWS.am-ի հետ զրույցում ասաց, որ երեխաներին օգնելու համար կազմակերպված դրամահավաքի գումարով ընտանիքը մի քանի ամսով բնակարան է վարձել։
«Կինը տեղեկացրեց ինձ, որ բազմաթիվ հանդիպումներ է ունեցել, բայց պետական աջակցություն` անգամ 100 դրամի, ընտանիքը չի ստացել։ Միայն բարերաների օգնությամբ է, որ ընտանիքն ապրելու վայր ունի, երեխաները կարողանում են սնվել»,- NEWS.am-ի հետ զրույցում ասաց փաստաբանը։
Հիշեցնենք, որ Մհեր Մազմանյանի երեխաներին օգնելու նպատակով կազմակերպված դրամահավաքի արդյունքում հավաքվել էր 424 հազար 30 դրամ:
Հիշեցնենք, որ Մհեր Մազմանյանի երեխաներից ամենաավագը՝ 17-ամյա դուստրը, հոր ձերբակալությունից հետո հրաժարվել է համալսարան ընդունվելու մտադրությունից: Ընտանիքի ապրուստի միակ միջոցը մնացել է Մհերի 15-ամյա որդու՝ ավտոլվացման կետից օրական ստացած 1000-1500 դրամ աշխատավարձը:
Մազմանյանի փաստաբան Նիկոլայ Բաղդասարյանը դիմել է պատկան մարմիններին, որ պետությունն ըստ օրենքով սահմանված կարգի այս ընթացքում իր վրա վերցնի անչափահաս երեխաների ապրուստի միջոցը հոգալը, սակայն դեռ ոչ մի պատասխան չի ստացել:
Ըստ փաստաբանի՝ Մհեր Մազմանյանին մեղադրանք են առաջադրվել անհիմն՝ հիմնվելով միայն «Սասնա ծռեր» խմբի անդամների հետ ունեցած հեռախոսազանգի վրա: