Սարի թաղում հուլիսի 29-ին իշխանության ներկայացուցչի նկատմամբ բռնություն գործադրելու մեջ մեղադրվող՝ «Հիմնադիր խորհրդարանի» աջակից Վահագն Ղումաշյանի խափանման միջոց կալանքը փոխելու վերաբերյալ՝ պաշտպանի միջնորդությունը Վերաքննիչ քրեական դատարանն այսօր՝ օգոստոսի 24-ին մերժել է: Այս մասին NEWS.am-ի հետ զրույցում ասաց նրա պաշտպան Հայկուհի Հարությունյանը:
«Բացարձակ անհիմն, իրավական որեւէ գնահատականի, մեկնաբանության չենթարկվող, կամայական, քմահաճ որոշում կայացրեց դատարանը»,- ասաց փաստաբանը՝ նշելով, որ Վահագն Ղումաշյանը, ըստ նախաքննական մարմնի, քար է նետել ոստիկանի ուղղությամբ, որի ինքնությունը մինչեւ հիմա պարզ չէ:
Հայկուհի Հարությունյանի խոսքով՝ իր պաշտպանյալը հուլիսի 29-ին Սարի թաղում չի եղել ընդհանրապես, ինչն ապացուցվել է նրա հեռախոսային զանգերի վերծանումներով, այդ ժամանակ ֆեյսբուքյան էջից օգտվելու վայրի հասցեով:
«Բացի այդ՝ դատարանը որոշման հիմքում դրել էր այնպիսի արձանագրություններ, որոնք գոյություն չունեն: Օրինակ՝ տուժողի հարցաքննություն, մեղադրյալի հարցաքննություն: Մինդեռ մեղադրյալը մինչեւ հիմա չի հարցաքննվել»,- ասաց պաշտպանը: