Վերաքննիչ քրեական դատարանն այսօր՝ օգոստոսի 25-ին ավարտեց «Սասնա ծռեր» խմբին սնունդ հասցրած Արթուր Սարգսյանի խափանման միջոց կալանավորումը վերացնելու վերաբերյալ փաստաբանի միջնորդության քննարկումը: Այս մասին լրագրողների հետ զրույցում ասաց նրա պաշտպան Տիգրան Եգորյանը՝ հույս հայտնելով, որ դատարանը գոնե մեկ անգամ նորմալ դատական ակտ կկայացնի:
«Արթուր Սարգսյանի մեղադրանքը փոխվել է: Նա կալանավորել էր նախորդ մեղադրանքով նախատեսված արարքին առնչություն ունենալու վերաբերյալ հիմնավոր կասկածը հաստատվելու արդյունքում, նոր մեղադրանքով ներկայացված արարքներին Արթուր Սարգսյանի առնչություն ունենալու վերաբերյալ հիմնավոր կասկածը չի գնահատվել: Այսինքն դատարանն ընդամենը պետք է ներկայացված թղթերը կարդա, հասկանա սա ու վերացնի այն դատական ակտը, որի հիմքերը վերացել են»,- ասաց փաստաբանը:
Նշենք, որ նախորդ նիստը հետաձգվել էր, քանի որ դատարանը ցանկություն էր հայտնել այս առնչությամբ հարցեր ուղղել դատախազին ու քննիչին: Փաստաբանը ավելորդ է համարում նման պարագայում դատախազին ու քննիչին հարցեր ուղղելը, քանի որ փաստաթղթերով ամեն ինչ պարզ է:
Նշենք, որ որոշումը կհրապարակվի վաղը՝ օգոստոսի 26-ին: Արթուր Սարգսյանը ներկա է եղել այսօրվա նիստին, ներկա է լինելու նաեւ վաղը:
Հիշեցնենք, որ սկզբում Արթուր Սարգսյանը մեղադրվում էր զինված խմբի կազմում նախնական համաձայնության շրջանակներում հուլիսի 17-ին ՊՊԾ գնդի տարածք մտնելու մեջ: Հետագայում նրա մեղադրանքը փոխվեց: Նա այժմ մեղադրվում է «Սասնա ծռերին» օժանդակելու մեջ:
Լուսանկարը՝ photolure.am