«Սասնա ծռեր» խմբի կալանավորված անդամ, ոտքից վիրավոր Հովհաննես Հարությունյանը պատրաստ կլինի վիրահատության մոտ 2 շաբաթից: Այս մասին հաղորդագրություն է տարածել ՀՀ արդարադատության նախարարության քրեակատարողական վարչությունը՝ արձագանքելով Հովհաննես Հարությունյանի պաշտպանի հայտարարություններին, որ նրան պատշաճ բուժօգնություն չի ցուցաբերում:
«Զանգվածային լրատվության միջոցներով հերթական ապատեղեկատվությունն է տարածվել ՀՀ ԱՆ «Դատապարտյալների հիվանդանոց» քրեակատարողական հիմնարկում պահվող զինված խմբի անդամ Հովհաննես Հարությունյանի պաշտպան Հայարփի Սարգսյանի կողմից իր պաշտպանյալին իբր քարանձավային պայմաններում, առանց որեւէ մասնագիտական բուժօգնություն եւ խնամք ցույց տալու պահման վերաբերյալ:
Հասկանալի է, իհարկե, երիտասարդ փաստաբանի` ցանկացած եղանակով ինքնագովազդվելու եւ կայանալու ձգտումը, սակայն Քրեակատարողական ծառայությունը եւս մեկ անգամ վստահեցնում է, որ հնչեցվածն ամբողջովին հերյուրանք է, եւ իրականության հետ որեւէ աղերս չունի:
Ինչ վերաբերում է այն շահարկմանը, թե Հովհաննես Հարությունյանի վիրահատությունը դիտավորյալ է ձգձգվում, եւ իրենք չեն վստահում ոչ «Դատապարտյալների հիվանդանոց» ՔԿՀ-ի, ոչ էլ «Էրեբունի» ԲԿ-ի մասնագետներին, եւ պահանջում են իրենց կողմից առաջարկված բժշկի եզրակացությունը, ու իբր խոչընդոտվել է նրա մուտքը քրեակատարողական հիմնարկ, նշենք հետեւյալը:
Հովհաննես Հարությունյանի հարազատների կողմից առաջարկված բժիշկը`Սերոբ Մխչյանը, երեկ` 24.08.2016թ., այցելել է վերոնշյալ կալանավորված անձին, զննել է վերջինիս եւ համակարծիք եղել թե «Դատապարտյալների հիվանդանոց» ՔԿՀ-ի, թե «Էրեբունի» ԲԿ-ի վնասվածքաբանների հետ այն հարցի շուրջ, որ Հովհաննես Հարությունյանը պատրաստ կլինի վիրահատության շուրջ 2 շաբաթ հետո:
Հաշվի առնելով այն հանգամանքը, որ վերոնշյալ փաստաբանի`ստահոդ լուրեր տարածելու միջոցով հանրությանը մոլորեցնելու գործելաոճը արդեն կրում է շարունակական բնույթ, ներկայումս քննարկվում է ՀՀ փաստաբանների պալատ համապատասխան գրություն ուղարկելու հարցը»,- ասված է հայտարարությունում:
Հիշեցնենք, որ Հովհաննես Հարությունյանի առողջական վիճակը վատացել էր, սակայն պաշտպաններն ահազնագում էին, որ նրան պատշաճ բուժօգնություն չի ցուցաբերվում: Դա նրանք դիտարկում էին որպես խոշտանգում Հովհաննեսի նկատմամբ: 2 օր է՝ «Սասնա ծռերի» աջակիցները բողոքի ակցիաներ են կազմակերպում: Նրանք հանդիպել էին Մարդու իրավունքների պաշտպանի հետ, որը խոստացել էր բողոքին ընթացք տալ:
