Հայաստանում ֆրանսիական արտադրության ջերմոցների պահանջարկն աճում է: NEWS.am-ի թղթակցի հետ զրույցում այս մասին հայտարարեց Հայ-ֆրանսիական առեւտրի պալատի գործադիր տնօրեն Էլոդի Բիոլեն:
Հայաստանում ավելի ու ավելի շատ խոշոր ջերմոցներ են շահագործվում՝ մեծ բերքատվությամբ եւ շրջանառությամբ, որոնք ժամանակակից սարքավորումներ են գնում: «Նրանց հետ հաջողությամբ համագործակցում է ֆրանսիական Richel Group-ը, որը ջերմոցների խոշորագույն արտադրողներից է Եվրոպայում»,- հավելեց նա:
Հայաստանում ֆրանսիական ընկերությունները ներկայացված են նաեւ տեխնոլոգիաների այլ ոլորտներում: «Օրինակ՝ Artelia ինժեներական ընկերությունը կամ ՏՏ ծառայություններ մատակարարող Egylis-ը կանոնավորապես հայկական շուկայում մրցույթների են մասնակցում»,- նշեց Բիոլեն:
