Համակարգչային տեխնիկայի մասնագետ՝ ժամանակակից նոթբուքերի նախատիպ Compass-ի հեղինակ բրիտանացի Ջոն Էլենբին մահացել է 75 տարեկան հասակում, հայտնում է The New York Times-ը:
Նրա մահվան մասին տեղեկությունը հաստատել է որդին՝ Թոմասը: Էլենբին Սան Ֆրանցիսկոյի իր տանը մահացել է օգոստոսի 17-ին, սակայն նրա մահվան պատճառը դեռեւս հաստատված չէ:
1980-ական թվականների սկզբին նա Քալիֆորնիայում հիմնել է Grid Systems ընկերությունը, իսկ ինժեներների եւ դիզայներների թիմում վերցրել է Ուիլյամ Մոգրիջին: Նրանք միասին մշակել են առաջին շարժական Compass համակարգիչը, որը շուկա է մտել 1982 թվականին:
Պարբերականը նշում է, որ այս համակարգիչը «իր ժամանակից շատ ավելի վաղ է» հայտնվել: Այն օգտագործվել է խոշոր ընկերություններում, Սպիտակ տանը եւ Պենտագոնի աշխատակիցների կողմից, նաեւ Challenger շաթլում՝ տիեզերագնացների կողմից:
Գնի պատճառով՝ 8150 դոլար, համակարգիչը տարածված էր ոչ թե սովորական գնորդների, այլ զինվորականների եւ Վաշինգթոնի հատուկ ծառայությունների շրջանում:
