Ռուսաստանի տուրօպերատորները Թուրքիայում հանգստանալու համար տուրփաթեթներ են պատրաստում, հայտնում է Ռուսաստանի տուրօպերատորների միության մամուլի ծառայությունը:
«Տուրօպերատորներն այսօրվանից իրենց կայքերում Թուրքիայում հանգստանալու ծրագրեր կհրապարակեն՝ ապահովելով չարթերային տեղափոխում»,- հայտնել են միությունից: Թուրքիայի եւ ՌԴ միջեւ չարթերային թռիչքների արգելքը չեղարկվել է օգոստոսի 28-ին:
Միությունում նաեւ նշել են, որ «փորձագետների գնահատմամբ՝ սեպտեմբեր-հոկտեմբերին զբոսաշրջիկների հոսքը մեծ չի լինի», տուրօպերատորները հավանաբար իրենց ջանքերը կկենտրոնացնեն տարածաշրջաններում չարթերային ծրագրեր մշակելուն, որտեղ թավշյա սեզոնին զբոսաշրջիկների թիվը, ի տարբերություն Մոսկվայի եւ Սանկտ Պետերբուրգի, զգալիորեն փոքր է:
Միությունում կարծում են, որ Թուրքիա «տուրուղեւորության վերջնական գինը կախված կլինի ոչ միայն չարթերային թռիչքից, որը տուրփաթեթը կէժանացնի 20-30 տոկոսով, այլ նաեւ թուրք հյուրանոցատերերի դիրքորոշումից»:
«Ակնկալվում է, որ թուրքական հյուրանոցների գները չեն բարձրանա, քանի որ սեզոնն արդեն ավարտվում է, եւ հյուրանոցատերերը կձգտեն Ռուսաստանից որքան հնարավոր է մեծ թվով հանգստացողների գրավել՝ թավշյա սեզոնին այցելուների բավարար քանակ ունենալու համար»,- ընդգծել են միությունում: