Ucom Հիմնադրամի եւ Վորլդ Վիժն Հայաստանի համատեղ ջանքերով իրականացվող «Պահենք երեխաներին ընտանիքում» բարեգործական նախագծի շնորհիվ Ucom-ի բաժանորդներն այս ամիս եւս մեկ ընտանիքի աջակցեցին կայուն եկամտի աղբյուր ստեղծելու գործում: Այս անգամ աջակցությունը տրամադրվել է Արագածոտնի մարզի գյուղական համայնքներից մեկում բնակվող երեք զավակների ծնողներ՝ Հարությունի եւ Մարիամի ընտանիքին:
12-ամյա Գոհարը գլխի հետ կապված առողջական խնդիրներ ունի, իսկ 6-ամյա Բաբկենը՝ նյարդային խանգարում: Ծանր սոցիալական պայմանների հետեւանքով երկուսն էլ գիշերօթիկ դպրոց են հաճախում: Հարությունը շաքարախտ ունի եւ գտնվում է բժիշկների մշտական հսկողության տակ: Ընտանիքի երրորդ երեխան՝ Էլիզան, այժմ 4 տարեկան է: Երկու տարի առաջ Էլիզայի ծնողներն ստիպված էին վաճառել իրենց հորթը, որպեսզի թոքաբորբով հիվանդացած Էլիզային տեղափոխեն հիվանդանոց եւ ապահովեն բուժման համար անհրաժեշտ ծախսերը: Վարձով բնակվող այս ընտանիքը տեւական ժամանակ է, ինչ փորձում է գումար հավաքել նորից ընտանի կենդանի գնելու համար, սակայն 22000 դրամ նպաստը եւ 80000 դրամ կազմող հոր աշխատավարձը, որն, ի դեպ, չի լինում ձմռան ամիսներին, բավականացնում է միայն ընտանիքի խիստ անհրաժեշտ կենսական կարիքներն հոգալու համար:
Գիշերօթիկ դպրոցում գտնվող երեխաներին մայրը տուն էր բերում միայն հանգստյան օրերին ու արձակուրդի ժամանակ, խոստանալով, որ դպրոցն ավարտելուն պես նրանք մշտապես միասին կլինեն:
«Պահենք երեխաներին ընտանիքում» ծրագրի շրջանակներում, հաշվի առնելով անասնապահության դերն ընտանիքի սոցիալ-տնտեսական վիճակի բարելավման գործում, Հարությունին տրամադրվել է կով, հավ եւ անասնակեր՝ անասնապահական աշխատանքները վերսկսելու, սննդի հարցը որոշակի չափով լուծելու, նաեւ եկամուտ ապահովելու համար:
Ընտանիքի ծնողները վստահ են, որ այժմ արդեն կկարողանան ապահովել իրենց ընտանիքի առաջնային կարիքները։ Այս ամբողջի արդյունքում երեխաներն արդեն իսկ վերադարձել են իրենց ընտանիքի գիրկը։
«Այս ծրագրի կարեւորագույն բաղկացուցիչներից է այն, որ Յուքոմի յուրաքանչյուր բաժանորդ հնարավորություն ունի մասնակցելու բարեգործությանը եւ գործնական աջակցություն ցուցաբերելու ծայրահեղ աղքատության մեջ հայտնված այն ընտանիքներին, որոնց երեխաներն ստիպված են մեծանալ պետական հաստատություններում: Յուրաքանչյուր ամսվա հանգանակությունները թույլ են տալիս ծնողների համար կայուն եկամուտի աղբյուր ստեղծել ու երեխաների կյանքում շոշափելի փոփոխություններ արձանագրել», - ասել է Ucom Հիմնադրամի տնօրեն՝ Աշոտ Բարսեղյանը:
«Երեխաների խնամքի եւ պաշտպանության հաստատություններում գտնվող երեխաների մեծ մասն այնտեղ է հայտնվում միայն այն պատճառով, որ ծնողը հնարավորություն չունի ապահովելու նրա առաջնային կարիքները։ Ծրագրի շրջանակներում մենք աջակցում ենք ընտանիքներին՝ ապահովելու տնտեսական կայունություն, ինչի շնորհիվ այս երեխաները կշարունակեն իրենց տանը վայելել իրենց ծնողների սերն ու հոգատարությունը», - ասել է Վորլդ Վիժն Հայաստանի ծրագրերի տնօրեն՝ Ժիրայր Էդիլյանը:
