«Հայաստանի Հանրապետական կուսակցությունը» տեղական իշխանությունների ընտրություններում սատարում է առաջին հերթին նրան, ում ժողովուրդն է աջակցում: Այս մասին օգոստոսի 29-ին լրագրողներին հայտնել է ՀՀԿ-ական պատգամավոր Լեռնիկ Ալեքսանյանը:
Դրա վառ օրինակն է ՀՀԿ անդամ չհանդիսացող Գյումրիի քաղաքապետ Սամվել Բալասանյանին արված առաջարկը՝ գլխավորել քաղաքի Ավագանու խորհրդի թեկնածուների ցուցակը (այսինքն նորից առաջադրվել քաղաքապետի պաշտոնի համար)
«Այո, նա մեր կուսակցությունից չէ, բայց մեր ընկերները տեղերում լսում ու հաշվի են առնում գյումրեցիների տեսակետները: Գյումրիից մեր պատգամավոր Սուքիաս Ավետիսյանը ու մեր մյուս կուսակիցները հաստատել են, որ ժողովրդի համակրանքը Բալասանյանի կողմից է: Այո, նա մեր կուսակիցը չէ: Հետո ի՞նչ: Մենք ուզում ենք, որ մեր թեկնածուն վայելի մարդկանց վստահությունն ու հարգանքը: Մեզ համար կարեւորը ժողովրդի կարծիքն է»- ասել է Ալեքսանյանը:
Քաղաքային ներկայացուցչական մարմինների (ավագանու խորհրդի) ընտրությունները Գյումրի ու Վանաձոր քաղաքներում (հանրապետության՝ մեծությամբ 2-րդ ու 3-րդ քաղաքներում) պաշտոնապես նշանակված են հոկտեմբերի 2-ին:
