Գերմանիայում ապրող իսլամիստները փորձում են հայտնվել գերմանական բանակի շարքերում, որպեսզի ռազմական պատրաստվածություն ստանան, իսկ հետո ստացած հմտությունները գործածեն ահաբեկչական հարձակումներ կազմակերպելու համար, հայտնում է Die Welt–ը՝ վկայակոչելով իր աղբյուրները:
Պարբերականի տվյալներով, բունդեսվերում ծառայության են անցել 64 ենթադրյալ իսլամիստներ: Բացի դրանից, հետախուզությունը Գերմանիայի բանակում հայտնաբերել է 268 կասկածյալ աջ արմատականների ու վեց ձախ ծայրահեղականների:
Հայտնում են, որ Գերմանիայի ռազմական ղեկավարությունը մտադիր է փոփոխություններ անել օրենսդրությունում, որոնց համաձայն բանակում ծառայության անցնելու ցանկություն հայտնողները անվտանգության նկատառումներով ավելի խիստ ստուգումների կենթարկվեն: Երկրի պաշտպանության նախարարության ներկայացուցիչը հայտնել է, որ կառավարությունը հիմա օրինագծի վերաբերյալ որոշումներ է կայացնում:
Այս տարվա ապրիլին Գերմանիայի իշխանություններն արդեն մտահոգություն են հայտնել երկրի բանակում իսլամիստների հնարավոր ներկայության կապակցությամբ: Այն ժամանակ հայտնել էին բունդեսվերի առնվազն 29 նախկին զինծառայողների մասին, որոնք վերջին տարիներին մեկնել են Սիրիա ու Իրաք, որտեղ չհաստատված տեղեկություններով, անդամագրվել են «Իսլամական պետություն» ահաբեկչական խմբավորմանը, հայտնում է Gazeta–ն: