Ուզբեկստանի նախագահ Իսլամ Կարիմովի հոսպիտալացումը ու երկրում իշխանության փոխանցման հավանականությունը համընկնում են այն պահի հետ, երբ ամբողջ Կենտրոնական Ասիան կանգնած է բարդագույն խնդիրների առաջ՝ տնտեսության ու հետխորհրդային տարածքի անվտանգության ոլորտներում, գրում է Foreign Policy–ն:
«Կարիմովի հեռանալուց հետո կլինեն պարտվածներ, անկախ նրանից, թե որքան հարթ կանցնի իշխանափոխությունը: Առանց իշխանության փոխանցման նախապես համաձայնեցված ընթացակարգերի ու բաց ընտրությունների անցկացման հարցում փորձի՝ ցանկացած ոք, ով կգա իշխանության, երկրում կպահպանի քաղաքական ճնշումների նույն մակարդակը կամ էլ նույնիսկ ավելի կոշտ մեթոդների կդիմի»- ասել է Էրիկա Մարատը, ԱՄՆ ազգային պաշտպանության համալսարանի դոցենտը:
Նշում են, որ վերջին տարիներին բազմիցս քննարկումներ են եղել այն հարցի շուրջ, թե ով կդառնա Ուզբեկստանի հաջորդ նախագահը: Շատերը Կարիմովի ավագ դուստր Գյուլնարային էին համարում հավանական իրավահաջորդ, բայց նրա վերելքը իշխանական աստիճանավանդակով ընդհատվեց դատական գործով:
Պարբերականը ենթադրություն է հայտնել, որ Ուզբեկստանի իշխանությունները արդեն որոշել են, թե ով է լինելու Կարիմովի իրավահաջորդը
«Այն փաստը, որ նախագահի հիվանդությունը լուսաբանվում է, նշանակում է, որ ամենայն հավանականոթյամբ արդեն որոշված է, թե ով կլինի նրա հաջորդը»- համարում է Լուկա Անչեսկին, Գլազգոյի համալսարանի Կենտրոնական Ասիայի հարցերով փորձագետը
Նրա կարծիքով նախագահի փոփոխությունը դեռ չի նշանակում ռեժիմի փոփոխություն:
Foreign Policy –ն գրում է, որ իշխանափոխության հեռանկարը կարող է վատացնել Ուզբեկստանի առանց այդ էլ երերուն դիրքերը: Եվ այսպես Ռուսաստանում տնտեսական բարդությունները նվազեցրել են այնտեղ աշխատող 2 մլն ուզբեկների գումարային փոխանցումները, իսկ Չինաստանի տնտեսական աճի դանդաղումը նվազեցրել է տարածաշրջանում ներդրումները:
Բացի դրանից երկրում կա «արմատական իսլամի ուրվականը»: Բացառված չէ, որ ճնշումների ավելացման հետևանքով ծայրահեղական խմբերին միացող մարդկանց թիվը նույնպես կաճի:
«Ֆերգանա» գործակալությունը օգոստոսի 29-ի երեկոյան հայտնել է, որ Կարիմովը մահացել է կաթվածի հետևանքով: Ընդ որում Ուզբեկստանի նախագահի աշխատակազմից այս տեղեկությունը դեռ չեն հաստատել: