Լեռնային Ղարաբաղի հակամարտության կարգավորման բանակցային գործընթաց այսօր գոյություն չունի: Այս մասին, այսօր՝ օգոստոսի 31-ին, լրագրողների հետ հանդիպման ժամանակ նշել է ՀՀԿ խմբակցության պատգամավոր Շիրակ Թորոսյանը:
Նրա խոսքով, Հայաստանում ոչ ոք չի մտածում ադրբեջանական կողմին հողեր զիջելու մասին, «բացի նրանցից, որոնք խոսում են այդ մասին»: «Ինչ վերաբերում է փոխադարձ զիջումներին, որոնց մասին խոսում են ԵԱՀԿ Մինսկի խմբի համանախագահները, այդ զիջումները չպետք է քննարկել տարածքների վերադարձի տեսքով»,-ընդգծեց Թորոսյանը՝ հավելելով, որ հայկական կողմը կորցրել է Արծվաշենը, Մարտակերտի մի մասը, հյուսիսում Գետաշենն ու Մարտունաշենը:
«Մենք պետք է պատրաստ լինենք ցանկացած զարգացման: Ապրիլյան քառօրյա պատերազմը եւ դրան հետեւած իրադարձությունները ցույց տվեցին, որ ադրբեջանական կողմն արժանի չէ վստահության ոչ միայն հայկական կողմի, այլեւ միջազգային հանրության»,-ասաց Շիրակ Թորոսյանը` հավելելով, որ ներկայումս մենք ամրապնդում ենք առաջնագիծը, մեծացնում բանակի մարտունակությունը:
«Վիեննայում եւ Սանկտ Պետերբուրգում հանդիպումներից հետո ադրբեջանական կողմը ցուցյ է տվել, որ հանդես է գալիս երկակի դիրքորոշմամբ, առաջինը միջազգային հանրության հանդեպ, երկրորդը՝ ներքին լսարանի: Եթե մինչեւ ապրիլյան պատերազմը հայկական կողմը պատրաստ էր որոշակի փոխզիջումների, ապա պատերազմից հետո Ադրբեջանը փաստացի հրաժարվում է ցանկացած տեսակի խոսակցությունից եւ բանակցություններից: Այս պայմաններում բանակցային սկզբունքները, բնականաբար, պետք է փոփոխվեն»,-նկատել է Շիրակ Թորոսյանը:
Հայկական կողմը, նրա համոզմամբ, պետք է ավելի խիստ դիրքորոշում որդեգրի. «Եթե ադրբեջանական կողմը շարունակում է ռազմաշունչ հռետորությունը, մենք պետք է ցույց տանք, որ պատրաստ ենք դրան: Իհարկե, պատերազմն ամենասարսափելին է, բայց եթե չկա սեղանի շուրջ բանակցություններով հարցը լուծելու հնարավորություն, մենք պետք է պատրաստ լինենք դրան: Մենք պատրաստ ենք համարժեք պատասխան տալ ցանկացած ադրբեջանական ագրեսիայի»,-ամփոփեց պատգամավորը: