Բելգիայի հատուկ ծառայությունների կազմած՝ ահաբեկչական գործունեություն ծավալած անձանց ցուցակում Ռուսաստանի 29 քաղաքացի կա: Այս մասին հայտնում է DW-ն՝ վկայակոչելով Knack պարբերականը:
Ռուսաստանցիներից չորսը նաեւ Բելգիայի քաղաքացիություն ունեն: Բելգիայի հատուկ ծառայությունների տեսադաշտում հայտնված ՌԴ քաղաքացիների մեծ մասը Հյուսիսային Կովկասից են, հիմնականում՝ Չեչնիայից: Ինչպես հայտնել է Սպառնալիքների վերլուծության համակարգման բելգիական կենտրոնի ներկայացուցիչ Պաուլ վան Թիգհելթը, նրանք կապված են «Կովկասյան էմիրություններ» ահաբեկչական կազմակերպության հետ: Բելգիայում նրանք իսլամի քարոզչությամբ են զբաղվել, իսկ որոշ դեպքերում՝ ծայրահեղականներին ֆինանսապես օժանդակելով:
Ցուցակի ՌԴ անձնագրերով 11 անձինք այժմ գտնվում են Սիրիայում եւ Իրաքում, եւս 13-ը Բելգիա են վերադարձել: Ահաբեկիչներից մեկին հաջողվել է բռնել ճանապարհին, եւս չորսը երկրից հեռացել են:
Բելգիայի հատուկ ծառայությունների ցանկում ընդհանուր 614 մարդ է ներառված: Նրանց մեջ, ՌԴ քաղաքացիներից բացի, կան Բելգիայի, Ֆրանսիայի, Մարոկկոյի, Ալժիրի, Նիդերլանդների, Իտալիայի, Սիրիայի, Թունիսի եւ Մակեդոնիայի քաղաքացիներ:
