ՀՀԿ-ն չի բացառում Ընտրական օրենսգրքում նոր փոփոխությունների հնարավորությունները։ Այդ մասին այսօր՝ օգոստոսի 31-ին ՀՀԿ Գործադիր մարմնի նիստից հետո լրագրողների հետ զրույցում ասել է ՀՀԿ մամուլի քարտուղար Էդուարդ Շարմազանովը։
Նա նշել է, թե ԳՄ նիստում քննարկել են ՏԻՄ առաջիկա ընտրությունները, խնդիրները, նաեւ Ընտրական օրենսգրքի հետ կապված իրավիճակը։ «ԿԸՀ նիստի արդյունքում այլեւս այն փոփոխությունները, որ ընդունել էինք կոնսենսուսի պարագայում, այլեւս չեն գործում։ Բայց դա չի նշանակում, որ նոր փոփոխությունները հնարավոր չեն։ Պաշտոնապես հայտարարում եմ, որ ՀՀԿ-ն անելու է հնարավորը, որ վստահության մեխանիզմները ներդրվեն, որպեսզի ընտրական պրոցեսների եւ արդյունքների վերաբերյալ հանրության վստահությունն ավելանա։ Չենք բացառում լրացուցիչ մեխանիզմների ներդրում, չեմ բացառում միգուցե ցուցակների հրապարակումը, ընտրակեղծիքների համար պատժաչափերի խստացումը»,- ասել է նա։
Շարմազանովը վստահեցնում է, թե իրենք ունեն քաղաքական կամք, անելու են հնարավորը, որ լինեն մեխանիզմներ, որոնք գործնականում կբացառեն ցանկացած ընտրակեղծիքների բացառում։ «Եթե պետք լինեն փոփոխություններ Ընտրական օրենսգրքում, մենք կգնանք դրան»։
Պատասխանելով ՏԻՄ ընտրություններում ՀՀԿ-ի շանսերի մասին հարցին, նա ասել է. «Ի տարբերություն որոշ ընդդիմադիր ուժերի, մենք չենք խոսում շանսերից։ Ընդդիմության դաշտում ոչ թե հանրապետականի դեմ են պայքարում, այլ իրար նկատմամբ ենք քննադատական խոսքեր ասում, փորձում են ընդդիմության միակի դափնին շահել։
Եթե իշխանության դաշտում ամեն ինչ պարզ է, ընդդիմադիր դաշտում կան բազմաթիվ հին ու նոր կուսակցություններ, որոնք ցանկանում են ընդդիմադիր ընտրազանգվածի ձայներին տիրանալ։ Այնպես չէ, որ ուրախանում ենք, բայց դա քաղաքական գործընթաց է»։
