Առաջիկայում «Բարգավաճ Հայաստան» կուսակցությունը խորհրդարանին օրինագիծ է ներկայացնելու Քրեական օրենսգրքում փոփոխություններ կատարելու մասին, որը նախատեսելու է պատժաչափի խստացում ընտրությունների ժամանակ իրականացված հանցագործությունների համար: Այդ մասին հոկտեմբերի 14-ին կայացած մամուլի ասուլիսում հայտարարել է ԲՀԿ-ական պատգամավոր Նաիրա Զոհրաբյանը:
Նա ընդգծել է, որ ԲՀԿ-ն 2012 թվականի ընտրություններին հատուկ ուշադրություն է դարձնելու դրանց ազատ եւ արդար անցկացմանը: «Մենք ուշադիր հետեւելու ենք դրան եւ հետեւողական կլինենք, որ ողջ խստությամբ պատժվեն ոչ միայն մանր իրավախախտները, այլեւ կազմակերպիչները»- սպառնացել է Զոհրաբյանը:
Իր հերթին պետաիրավական հարցերի հանձնաժողովի նախագահ, հանրապետական Դավիթ Հարությունյանը նշել է, որ նոր ընտրական օրինագծով պահպանվում է 90 համամասնական եւ 41 մեծամասնական համամասնությունը: Նա ասել է, թե պահպանվելու է ընտրական հանձնաժողովների կազմավորման կուսակցական սկզբունքը, թեեւ քննարկվել է նաեւ արհեստավարժ հանձնաժողովներ ունենալու հարցը:
Նշենք, սակայն, որ նախորդ ընտրությունների փորձը ցույց է տալիս, որ ընտրությունները կեղծվում են համակարգված եւ իշխանությունների կողմից կազմակերպված, իսկ ընտրակեղծարարներն էլ չեն պատժվում անգամ գործող պատժաչափերով: Այդ տեսանկյունից, բոլորովին կարեւոր չէ, ընտրակեղծիքների համար նախատեսված պատժի չափը, քանի որ ընտրակեղծարարները, միեւնույն է, չեն պատժվում:
