Գրեթե 200 մարդ Բաշկիրիայի Բայմակսկի շրջանի Յարմուխամետովո գյուղում որոնում է երկու տարեկան աղջկա: Այս մասին հայտնում է ՏԱՍՍ-ը՝ վկայակոչելով Բաշկիրիայի ՆԳ նախարարության մամուլի ծառայությանը:
Նախնական տվյալներով՝ Իլսիյա Բաիմովան զբոսնել է տան բակում, փողոց տանող դռնակը բաց է եղել: Երեխայի հայրն ու մայրը գյուղի մեջ են եղել, եւ երեխային պետք է տատիկը հսկեր: Գյուղի բնակիչները աղջնակին վերջին անգամ տեսել են աղբյուրի եւ գետի ուղղությամբ գնալիս:
ՆԳ նախարարության տվյալներով՝ այժմ որոնումներին ներգրավված են ավելի քան 70 ոստիկաններ, Արտակարգ իրավիճակների նախարարության աշխատակիցներ, շներով կինոլոգներ, տեղի 100-ից ավելի բնակիչներ: Նրանք փնտրում են անտառում եւ մոտակայքում հոսող գետի ափամերձ տարածքում: Երեխայի որոնման աշխատանքներին ներգրավվել է նաեւ անօդաչու թռչող սարք: