Հայկական կողմը մի քանի անգամ, այդ թվում՝ ԱԳ նախարարի նամակով, Բարձր հանձնակատարի ուշադրությունն է հրավիրել Ադրբեջանի կողմից ապրիլին սանձազերծած ռազմական գործողությունների արդյունքում տեղ գտած մարդու իրավունքների եւ միջազգային հումանիտար իրավունքի կոպտագույն խախտումների վրա։ Այս մասին հայտարարել է ԱԳ նախարարության մամուլի քարտուղար Տիգրան Բալայանը՝ NEWS.am-ի խնդրանքով մեկնաբանելով նախօրեին Ժնեւում ՄԱԿ գերագույն հանձնակատարի ելույթը:
«
Սեպտեմբերի 13-ին մեկնարկած Մարդու իրավունքների խորհրդի 33-րդ նստաշրջանի բացմանը մարդու իրավունքներին առնչվող համաշխարհային զարգացումների շուրջ զեկույցով հանդես է եկել ՄԱԿ-ի Մարդու իրավունքների Բարձր հանձնակատար Զեիդ Ռաադ ալ Հուսեյնը, ով իր զեկույցում անդրադարձ է կատարել նաեւ Լեռնային Ղարաբաղի հակամարտությանը: Բարձր հանձնակատարը, մասնավորապես, անդրադարձել է ս.թ. ապրիլյան իրադարձություններին՝ նշելով, որ իր գրասենյակը հակամարտության իրավիճակում չի կարողացել մուտք ունենալ ԼՂ եւ ստուգել մարդու իրավունքների ոտնահարման դեպքերի մասին տեղեկատվությունը:
Հարկ է նշել, որ հայկական կողմը մի քանի անգամ, այդ թվում՝ ԱԳ նախարարի նամակով, Բարձր հանձնակատարի ուշադրությունն է հրավիրել Ադրբեջանի կողմից ապրիլին սանձազերծած ռազմական գործողությունների արդյունքում տեղ գտած մարդու իրավունքների եւ միջազգային հումանիտար իրավունքի կոպտագույն խախտումների վրա՝ կոչ անելով անաչառ գնահատականի արժանացնել զինվորական եւ քաղաքացիական անձանց նկատմամբ գործած անմարդկային դրսեւորումները:
Համոզված ենք, որ հասցեագրված համալիր գնահատականը հանդիսանալու է Ադրբեջանին նման գործողություններ ձեռնարկելուց զերծ պահող գործոններից մեկը:
Սեպտեմբերի 14-ին Բարձր հանձնակատարի զեկույցի շուրջ կայացած ընդհանուր քննարկումների ընթացքում Ժնեւում ՀՀ մշտական ներկայացուցչությունն իր ելույթում անդրադարձ է կատարել ԼՂ հակամարտության վերաբերյալ զեկույցում տեղ գտած դիտարկումներին՝ ափսոսանք հայտնելով, որ մինչ այժմ տեղի չի ունեցել ԲՀ գրասենյակի կողմից գնահատման առաքելություն Լեռնային Ղարաբաղ, եւ վերահաստատելով ՀՀ պատրաստակամությունը լիովին աջակցելու եւ նպաստելու Մարդու իրավունքների Բարձր հանձնակատարի գրասենյակի այցին ԼՂ: Սակայն այցի իրականացման համար անհրաժեշտ է հակամարտության մեջ ներգրավված բոլոր կողմերի համաձայնությունը, եւ ակնհայտ է, թե որն կողմն է առայսօր խոչընդոտում այդ գործընթացին»,- հայտարարել է Տիգրան Բալայանը:
Հիշեցնենք, որ նախօրեին ԼՂՀ նախագահի մամուլի քարտուղար Դավիթ Բաբայանը հայտարարել էր ՄԱԿ գերագույն հանձնակատարի գրասենյակի հետ համագործակցության հարցում ԼՂՀ իշխանությունների պատրաստակամության մասին: