Թուրքիայում մեծ աղմուկ է հանել Facebook-ի թուրք օգտագործողների մոտ շրջանառության մեջ գտնվող «Թուրքիայի զինված ուժերում դաժանությունների կադրեր» անունով տեսանյութը, որտեղ մի քանի սպա կամ զինվոր, զորանոցում հերթով ծեծում եւ նվաստացնում են զինվորներին։
Թուրքական մամուլում այս աղմուկը բարձրացել է այն պատճառով, որ սկզբում մտածել են, թե այն տեղի է ունեցել Թուրքիայի բանակում։ Տեսանյութում մեկ ընդ մեջ հնչում են թուրքերեն բառեր։ Հետագայում ծագել է նաեւ վարկածը, որ տեսանյութը պատկերում է ադրբեջանական բանակում տիրող բարքերը, քանի որ տեսանյութում մահճակալներից մեկի վերեւում երեւում է ադրբեջանական դրոշն ու հայր եւ որդի Ալիեւիների նկարը։
Թուրքական որոշ լրատվամիջոցներ նշել են, որ սա քուրդ զինյալների հերթական սադրանքն է, որ նրանք շատ լավ իմանալով, որ դեպքը տեղի է ունեցել ադրբեջանական բանակում, տեսանյութը սոցիալական ցանցեր են գցել "Թուրքիայի զինված ուժերում դաժանությունների կադրեր" վերտառությամբ, որպեսզի պատասխանատվությունը գցեն թուրքական բանակի վրա։
Հիշեցնենք, որ ադրբեջանական բանակում տեղի ունեցած այս տեսանյութը անցյալ տարի է ի հայտ եկել։