Սերժ Սարգսյանն այսօր՝ սեպտեմբերի 19-ին, մասնակցել է «Made in Armenia. Արտադրված է Հայաստանում» ցուցահանդեսի բացմանը:
Բացման խոսքում ՀՀ էկոնոմիկայի նախարարի պաշտոնակատար Արծվիկ Մինասյանը, մասնավորապես, նշել է.
«Այս ցուցահանդեսը հնարավորություն է տալիս Հայաստանի եւ Արցախի արտադրողներին, մեկտեղելով ջանքերը, ցուցադրել մեր տնտեսական հզորությունը: ՀՀ անկախության 25-ամյակին ընդառաջ, սա էլ տնտեսության զորահանդեսն է: Ցուցադրելով մեր արտադրողների կարողականությունը, մենք կարողանում ենքմի քանի հստակ ուղերձ հղել. Առաջինը՝ ինչպիսի արտաքին ու ներքին մարտահրավերներ են ձեւավորվում, մեր արտադրողները ի վիճակի են ստեղծելու, արարելու բարիքներ, միջազգային մրցունակությանը համապատասխան արտադրանք:
Երկրորդ ուղերձն ուղղված է մեզ՝ բոլորիս, ներառյալ սփյուռքին. Որակյան հայկական արտադրանքի ձեռքբերումն ու օգտագործումը հնարավորություն է տալիս հզորացնել մեր երկրի տնտեսությունը: Երրորդ ուղերձն ուղղված է թե օտարերկրյա, թե ներքին ներդրողներին: Ներդնելով ՀՀ տնտեսության մեջ, դուք կարողանում եք բազմապատկել ձեր ներդրումները, ձեր շահույթը»:
Նշենք, որ Երեւանի «Մերիդիան» ցուցահանդեսային կենտրոնում «Արտադրված է Հայաստանում-2016» ցուցահանդեսը կտեւի միչեւ սեպտեմբերի 22-ը, որի հիմնական նպատակն է` ներկայացնել Հայաստանի արդյունաբերության առկա ներուժը, զարգացման հնարավորությունները եւ նպաստել նոր շուկաների բացահայտմանը:
Ավանդաբար անցկացվող հայկական արտադրանքի ու ծառայությունների ցուցահանդեսին այս տարի Հայաստանից եւ Արցախից մասնակցում է ավելի քան 300 ընկերություն սննդի, ոսկերչության, ալկոհոլային խմիչքների, թեթեւ արդյունաբերության, դեղագործության, հանքարդյունաբերության, շինանյութերի, ճշգրիտ մեքենաշինության եւ տեղեկատվական տեխնոլոգիաների ոլորտներից: Ցուցահանդեսին մասնակցում են նաեւ գործարար պատվիրակություններ Հայաստանի տնտեսության համար հեռանկարային շուկաներ ներկայացնող երկրներից։
Հանրապետության նախագահը շրջել է տաղավարներով եւ հետաքրքրվել ցուցահանդեսում ներկայացված ընկերությունների արտադրանքով ու ծառայություններով, ընկերությունների ներկայացուցիչների հետ զրուցել նրանց խնդիրների եւ զարգացման ծրագրերի մասին: