Թուրքիայի Տրապիզոն քաղաքում ոստիկանության գործողությունների արդյունքում ձերբակալվել է 18 հոգի, այդ թվում՝ խմբավորման ղեկավար` հայաստանցի Գոհար Կիրակոսյանը, մի ոստիկան, ինչպես նաեւ հայ եւ վրացի 15 կին։
Թուրքական Milliyet-ի փոխանցմամբ՝ թուրքական ոստիկանությունը 10 ամիս առաջ տվյալներ էր ստացել, որ Հայաստանից եւ Վրաստանից անլեգալ ճանապարհով Թուրքիա են բերվել կանայք, որոնց ստիպել են զբաղվել մարմնավաճառությամբ։ Այս ընթացքում, ոստիկանությունը հետեւել է խմբավորման գործունեությանը եւ հոկտեմբերի 14-ի երեկոյան համաժամանակյա գործողությունների ընթացքում 3 հյուրանոցից, 6 սրճարանից եւ 8 տնից բերման է ենթարկել 18 հոգու։
Հայտնի է դարձել, որ խմբավորման ղեկավարը` 48-ամյա Գոհար Կիրակոսյանն է, ով թուրքի հետ է ամուսնացել եւ դարձել Թուրքիայի քաղաքացի: Նա Հայաստանում հետախուզման մեջ է գտնվում` թրաֆիկինգով զբաղվելու համար։
Բացի այդ, պարզվել է, որ մարմնավաճառությամբ զբաղված 15 հայ եւ վրացի կանանց մի մասն անօրինական ճանապարհով է հայտնվել Թուրքիայում։
Խմբավորման անդամները գործել են բավական զգույշ, օգտագործել են կոդեր, օրինակ, մարմնավաճառության համար օգտագործել են «թեյ խմել», մարմնավաճառներին «պայուսակ» եւ այլն։
Բերման ենթարկված 18 հոգին էլ կանգնել են դատարանի առաջ, որտեղ, ամենայն հավանականությամբ, նրանց կարտաքսեն Թուրքիայից։