Երկրում տնտեսական աճ ապահովող կառավարությունը, իշխանությունը միշտ չէ, որ հաղթում է ընտրություններում: Այս մասին այսօր` սեպտեմբերի 20-ին, լրագրողների հետ հանդիպմանն ասաց ՀՀԿ փոխնախագահ Արմեն Աշոտյանը` անդրադառնալով հարցին` ինչպես կարող է «Հանրապետական» կուսակցությունը վայելել հասարակության վստահությունը, երբ նորանշանակ վարչապետ Կարեն Կարապետյանը հայտարարեց, որ Հայաստանի տնտեսությունը խայտառակ վիճակում է գտնվում:
«Կայացած քաղաքական ուժեր շատ քիչ կան, այդ պատճառով էլ հասարակությունը շարունակում է վստահել այն մարդկանց, որոնք իշխանություն են ներկայացնում: Տնտեսական աճ ապահովող կառավարությունները միշտ չէ որ ընտրվում են, կամ միշտ չէ, որ հաղթում է ընդդիմությունը»,-ասաց նա:
Հարցին` ինչպես է գնահատում այն, որ թաղային հեղինակությունները Հայաստանի որոշ համայնքներում ազդել են ՏԻՄ ընտրությունների արդյունքների վրա, նշեց, որ Հայաստանում անցել են ժամանակները, երբ հեղինակությունները ազդում են ընտրությունների արդյունքների վրա:
