ԱՄՆ զինված ուժերի պատվիրակությունը մասնակցելու է ՀՀ անկախության 25-ամյակի տոնակատարություններին: ՀՀ պաշտպանության նախարարի պաշտոնակատար Սեյրան Օհանյանն, այսօր՝ սեպտեմբերի 20-ին, ընդունել է ԱՄՆ Կանզաս նահանգի ադյուտանտ-գեներալ, ազգային գվարդիայի հրամանատար, գեներալ-մայոր Լի Թաֆանելիին եւ Եվրոպայում ԱՄՆ ցամաքային զորքերի հրամանատարի տեղակալ, գեներալ-մայոր Ջոն Գրոնսկիին:
Կողմերը բարձր են գնահատել ՀՀ զինված ուժերի եւ Կանզասի ազգային գվարդիայի, Եվրոպայում ԱՄՆ ցամաքային զորքերի հետ համագործակցության մակարդակը, ընդգծելով որ բարձրաստիճան փոխայցելությունները, ներկայումս Հայաստանում գտնվող ԱՄՆ ԶՈՒ տարբեր փորձագիտական խմբերի առկայությունը եւս մեկ վկայություն են ակտիվ եւ արդյունավետ համագործակցության ու փոխադարձ վստահության: ՀՀ զինված ուժերի եւ Կանզասի ազգային գվարդիայի, Եվրոպայում ԱՄՆ ցամաքային զորքերի հետ համագործակցությունը ներառում է բազմաթիվ ուղղություններ` ՄԱԿ-ի հովանու ներքո խաղաղապահություն, միջազգային առաքելությունների համար ինքնաշեն պայթուցիկ սարքեր հայտնաբերող եւ վնասազերծող անձնակազմի պատրաստում, 2-րդ մակարդակի բուժօգնություն ապահովող դաշտային հոսպիտալի կարողությունների զարգացում եւ միջազգային հավաստագրում, արհեստավարժ սերժանտական կազմի ձեւավորում, բազմազգ համատեղ զորավարժություններ եւ այլն:
ԱՄՆ զինված ուժերի բարձրաստիճան պատվիրակությունը վաղը մասնակցելու է ՀՀ անկախության 25-րդ տարեդարձին նվիրված տոնակատարություններին: Նախատեսվում են նաեւ պատվիրակության այցերը ԱՄՆ ԶՈՒ փորձագիտական խմբերի օժանդակությամբ անցկացվող ինքնաշեն պայթուցիկ սարքերի հայտնաբերման եւ վնասազերծման դասընթացի, ինչպես նաեւ ՀՀ ԶՈՒ նորաստեղծ ռազմաբժշկական ուսումնական կենտրոնի հրահանգիչների վերապատրաստման դասընթացի անցկացման վայրեր: