2016-ի դեկտեմբերին Եվրասիական տնտեսական հանձնաժողովը Եվրասիական տնտեսական միության 5 երկրների ղեկավարներին կզեկուցի Իրանի հետ բանակցությունների առաջընթացի մասին: Այս մասին սեպտեմբերի 20-ին Երեւանում լրագրողներին ասել է ԵՏՀ առեւտրի նախարար Վերոնիկա Նիկիշինան:
Նրա խոսքով՝ ԵՏՄ 5 երկրներն էլ հետաքրքրված են համագործակցությամբ: Ապագա համաձայնագրի համար իրանցի գործընկերների հետ ինտենսիվորեն հաստատվում են նախնական պայմանավորվածությունները: «Մենք կուսումնասիրենք, թե հնարավոր համաձայնագիրը երկու կողմերի համար ինչ պայմաններ եւ պարտավորություններ կսահմանի: Կարծում եմ, որ դեկտեմբերին կկարողանանք հինգ նախագահներին զեկուցել կատարված աշխատանքի մասին: Մենք մեծ հույս ունենք, որ մեր զեկույցը ազգային առաջնորդներին կհամոզի, եւ նրանք անմիջապես մեզ մանդատ կտան համաձայնագրի շուրջ բանակցություններ վարելու համար»,- ասել է Նիկիշինան:
Բանակցությունների հաջորդ փուլը նախատեսված է հոկտեմբերի սկզբին: «ԵՏՄ երկրների ղեկավարների գլխավոր հանձնարարությունն այն է, որպեսզի կողմերի համաձայնեցրած արտոնությունները համաչափ լինեն. եթե իրանական որեւէ ապրանքախմբի համար բարենպաստ ռեժիմ է սահմանվում, ապա Իրանում համարժեք արտոնություններ պետք է ստանան նաեւ ԵՏՄ ապրանքները»,- ընդգծել է նա: