Հայաստանի զարգացման հիմնադրամի աջակցությամբ սեպտեմբերի 20-23-ը Փարիզում՝ «IFTM Top Resa-2016» ամենամյա միջազգային ցուցահանդեսին հայկական 7 ընկերություններ Հիմնադրամի հետ միասին ներկայացնում են Հայաստանն ու Արցախը, որպես գրավիչ զբոսաշրջային ուղղություններ:
Հայաստանի զարգացման հիմնադրամի մամուլի ծառայություն NEWS.am-ին հայտնում են, որ «IFTM Top Resa»-ն աշխարհում ոլորտի խոշորագույն իրադարձություններից է, որին մասնակցում են արտագնա զբոսաշրջությամբ զբաղվող գործակալություններ, հյուրանոցային եւ ռեստորանային ծառայություններ մատուցողներ, փոխադրող ընկերություններ եւ ծրագրավորողներ։ Ոլորտի այս խոշոր իրադարձությանը մասնակցում է 32 հազար գործարար ու մասնագետ՝ 158 երկրից, ինչը ցուցահանդեսը հարթակ է դարձնում եվրոպացի գործընկերների հետ նոր պայմանավորվածություններ ձեռք բերելու համար:
«Եվրոպան Հայաստանի համար թիրախային շուկա է, եւ դեպի Երեւան եվրոպական ավիափոխադրողների կողմից իրականացվող ուղիղ չվերթերը մրցունակ ու առավել գրավիչ են դարձնում հայկական ուղղությունը: Բացի այդ, եվրոպացի զբոսաշրջիկները գնահատում են էկոլոգիապես մաքուր սնունդը, պատմաճարտարապետական հուշարձանների առկայությունը, որոնցով այդքան հարուստ են հայկական երկու պետությունները: Կարծում եմ, այս ամենը կնպաստի հայկական զբոսաշրջային արդյունքի առաջխաղացմանը ֆրանսիական շուկայում»,-նշել է Հայաստանի զարգացման հիմնադրամի գործադիր տնօրեն Կարէն Մկրտիչեանը:
Դեպի Հայաստան ուղղությունը Փարիզում ներկայացնել ցանկացող բոլոր յոթ զբոսաշրջային կազմակերպությունները ցուցահանդեսին մասնակցում են հին գործընկերներին հանդիպելու եւ նոր ու արդյունավետ կապեր հաստատելու նպատակով: Ցուցահանդեսի մասնակից ընկերությունները ներկայացրել են իրենց ակնկալիքները:
«Գնում ենք նոր գործընկեր գտնելու եւ հների հետ հանդիպելու։ Այնտեղ ներկայացնելու ենք Հայաստանում առկա բոլոր տեսարժան վայրեր տուրերի մեր առաջարկները: Փորձում ենք բաց չթողնել հայկական զբոսաշրջային ապրանքների համար շուկա հանդիսացող երկրների նմանատիպ ցուցահանդեսները»,-նշել է «IFTM Top Resa-2016»-ի մասնակից «Ջեոգրաֆիկ Թրավել Քլաբ» ընկերության տնօրեն Աննա Պետրոսյանը:
«Տուր Դելիս» տուրիստական ընկերությունն առաջին անգամ է մասնակցում ֆրանսիական ցուցահանդեսին ու հանդես գալիս Հայաստանի ներգնա զբոսաշրջային առաջարկներով. «Լիահույս ենք, որ նոր կապեր կստեղծենք օտարերկրյա մեր գործընկերների հետ, գուցե նաեւ պայմանագրեր կնքվեն»,- նշել է ընկերության հիմնադիր Քրիստինա Նալբանդյանը:
«Մեր ընկերությունն այս տարվա ցուցահանդեսին մասնակցում է արդեն 9-րդ անգամ` ներկայացնելով դեպի Հայաստան ու տարածաշրջան համակցված, դասական ու արկածային տուրեր»,- նշել է «Սաբերատուր-Սեւան» ընկերության Ներգնա տուրիզմի վաճառքի մենեջեր Գագիկ Հակոբյանը։
«Հայաստանը բավականին ճանաչված ու ներկայացված է ֆրանսիական շուկայում, այնուամենայնիվ, արդեն 8-րդ անգամ մասնակցում ենք ցուցահանդեսին` ակնկալելով զբոսաշրջային հոսքի աճ հենց այս երկրից»,- նշել է «Լ. Ս. Ֆանտուր» ընկերության Ներգնա զբոսաշրջության վարչության ղեկավար Զառա Մալայանը: Ընկերությունը երեք հիմնական շեշտադրում է արել՝ ներկայացնել երկիրը մշակութային տուրերի միջոցով (ուխտագնացություն Հայաստան` դեպի առաջին քրիստոնեական երկիր, Հռոմի պապի այցի մասին ընդգծումով), Հայաստանը, որպես գինեգործական հարուստ ավանդույթներ ունեցող երկիր եւ ձմեռային տուրիզմի հնարավորությունների տեսանկյունից:
«Կներկայացնենք Հայաստանի բոլոր գրավիչ զբոսավայրերն ու մեր երկիրն ընտրած զբոսաշրջիկի հարմարավետության համար կառաջարկենք բոլոր անհրաժեշտ ծառայությունները»,- նշել է արդեն քսան տարի գործող եւ 5-րդ անգամ ցուցահանդեսին մասնակցող «Էլիտար» զբոսաշրջային ընկերությունը:
«Ֆրանսիական ցուցահանդեսից մեր ընկերության ամենամեծ ակնկալիքը 2017-ին դեպի Հայաստան մեծ զբոսաշրջային հոսքերի ապահովումն է: Հայաստանի բոլոր շրջանները ընդգրկող մեր կազմած փաթեթներով ուզում ենք խթանել գյուղական զբոսաշրջությունը, Հայաստանը ներկայացնել` որպես գինու բնօրրան, զբոսաշրջիկների ուշադրությունը գրավել Արցախի գեղատեսիլ բնության ու պատմամշակութային արժեքների վրա: Հայաստանը միայն եկեղեցիների երկիր չէ, ունենք շատ այլ հնարավորություններ եւս, որոնք պետք է ներկայացնենք Ֆրանսիայում»,- նշել է «Նուեվա Վիստա» ընկերության ներկայացուցիչ Ասյա Հովհաննիսյանը:
«IFTM Top Resa»-ն քառօրյա միջոցառում է, որը հիմնադրվել է 1978-ին ֆրանսիական Դովիլ քաղաքում՝ սկզբնապես ներառելով միայն հանգստին ուղղված զբոսաշրջային առաջարկներ։ Հետագայում միջոցառումն ընդլայնել է շրջանակը՝ դառնալով բազմաթիրախ շուկայական իրադարձություն եւ անցկացվում է Փարիզում։
