Նյու Յորքի եւ Նյու Ջերսիի պայթյունները կազմակերպելու մեջ կասկածվող Ահմադ Խան Ռահամիի հայրը շուրջ երկու տարի առաջ ոստիկանությանը հաղորդել է, որ իր որդին ահաբեկիչ է: Ըստ NYTimes-ի՝ Մոհամմադ Ռահամին լրագրողներին ասել է, որ երկու տարի առաջ սկսել է կասկածել, որ որդին «ծայրահեղական է դարձել»:
Հոր մոտ կասկածներ են առաջացել այն բանից հետո, երբ Ահմադը վիճել է հարազատ եղբոր հետ, իսկ հետո դանակահարել մի մարդու: Նրա խոսքով՝ հետաքննությունը երկու ամիս է տեւել, սակայն հատուկ գործակալներն ահաբեկիչների հետ Ահմադի որեւէ կապ չեն բացահայտել:
Ահմադի ձերբակալությունից հետո կատարված խուզարկության ժամանակ օրագիր է հայտնաբերվել, որում երիտասարդը գրել է «անհավատների սպանության մասին»: Բացի այդ, նա համակրել է «Ալ Քաիդա»-ի քարոզիչ Անվար ալ-Ավլաքիին:
