ԵԽԽՎ–ն հրապարակել է գնահատող առաքելության կազմը, որը դիտորդություն է իրականացնելու Ադրբեջանում սահմանադրական հանրաքվեի ժամանակ։ Այս մասին հայտնում է haqqin.az–ը՝ վկայակոչելով կազմակերպության կայքը։

«Առաքելությունը Ադրբեջան կժամանի իշխանությունների հրավերով։ Պատվիրակությունը կհանդիպի Ադրբեջանի ղեկավարության, Միլի Մեջլիսի խոսնակի, ԿԸՀ ղեկավարի, ԵԽԽՎ–ում Ադրբեջանի պատվիրակության անդամների, ինչպես նաեւ քաղաքացիական հասարակության եւ մամուլի ներկայացուցիչների հետ։ Հանրաքվեի օրը առաքելության անդամները ներկա կլինեն ընտրատեղամասերում»,– ասված է հաղորդագրության մեջ։

Պատվիրակության կազմում են Մակեդոնիայի ներկայացուցիչ Ալեքսանդր Նիկոլոսկին, Իտլաիայի ներկայացուցիչ Անդրեա Ռիգոնին, Բուլղարիայի ներկայացուցիչ Յանակի Ստոյլովը, Իսպանիայի ներկայացուցիչ Անտոնիո Գուտյերեսը, Լեհաստանի ներկայացուցիչ Դոմինիկ Տարչինսկին եւ Ադրբեջանի հարցով համազեկուցող Ստեֆան Շեննակը (Ավստրիա)։

Ադրբեջանում սահմանադրական հանրաքվեն տեղի կունենա սեպտեմբերի 26-ին։

Սահմանադրական դատարան փոխանցված նախագծի համաձայն՝ առաջարկվում է գործող նախագահի պաշտոնավարման ժամկետը երկարաձգել մինչեւ 7 տարի։ Նախագահին արտահերթ նախագահական ընտրություններ անցկացնելու լիազորություններ են տրվում։ Փաստաթուղթը նախատեսում է սահմանել փոխնախագահի ինստիտուտ։ Փոխնախագահին նշանակում եւ ազատում է նախագահը։ Եթե նախագահն ի վիճակի չի լինում կատարել պետության ղեկավարի պարտականությունները, ապա նրա լիազորություններն անցնում են առաջին փոխնախագահին։ Գործող սահմանադրությամբ դրանք անցնում են վարչապետին։ Տարբերությունն այն է, որ եթե վարչապետին նշանակում է խորհրդարանը, ապա առաջին փոխնախագահին պետության ղեկավարն ինքն է նշանակում, առանց որեւէ մեկի հետ համաձայնեցնելու։ Առաջարկվում է նաեւ լուծարել նվազագույն տարիքային շեմը նախագահի պաշտոնի թեկնածուի համար, որը հիմա 35 տարեկանն է։ Սահմանադրությամբ խորհրդարանի ցրման հնարավորություն տվող փոփոխություններ են նախատեսվում։