Մանկահասակ տարիքի հիշողությունները, որպես կանոն, կիսատ-պռատ են մտապահվում: Իր կյանքի որոշ փուլեր մարդը հստակ է հիշում, մյուսներն իսպառ ջնջվում են:
Տորոնտոյի մանկական հիվանդանոցի կատարած հետազոտությամբ պարզվել է այս երեւույթի հնարավոր պատճառը: Գաղտնիքը ուղեղում նոր բջիջների առաջացման մեջ է, հայտնում է Planet-today-ը:
Նախկինում այս կապակցությամբ տարբեր վարկածներ էին առաջ քաշվում: Ֆրոյդն, օրինակ, կարծում էր, որ մանկության հիշողությունների լիակատար բացակայությունը սեքսուալ ենթատեքստ ունի: Հետագայում ի հայտ եկած տեսակետի համաձայն՝ ինֆանտիլ ամնեզիայի պատճառը խոսքի զարգացումն է: Ըստ որում՝ դա միանգամայն համընկնում էր իրականությանը, քանի որ երեխաները շատ հաճախ իրենց սկսում են հիշել հենց խոսել սկսելուց հետո:
Մինչդեռ հետո պարզվել է, որ ինֆանտիլ ամնեզիան հատուկ է նաեւ կենդանիներին: Այդպիսով, այլեւս միանշանակ չէ այն կարծիքը, թե դրա համար պատասխանատու է միայն խոսքին տիրապետելը:
Այժմ գիտնականները կապ են հայտնաբերել նոր բջիջների վերջնական առաջացման եւ առաջին հիշողությունների ի հայտ գալու միջեւ: