Երեւանում հոկտեմբերին կանցկացվի Եվրասիական գործընկերության առաջին միջազգային ֆորումը, որի ընթացքում պոտենցիալ ներդրողներին կներկայացնեն Եվրասիական տնտեսական միության հնարավորությունները: Այս մասին հայտնել է Ռուսաստանի հայերի միության փոխնախագահ Լուսիկ Ղուկասյանը, փոխանցում է ՏԱՍՍ-ը:
Ֆորումը տեղի կունենա հոկտեմբերի 13-16-ին: «Մասնակցում են ռուսական խոշոր համակարգաստեղծ ընկերություններ, մեծ թվով արտասահմանյան երկրների ներկայացուցիչներ՝ Սաուդյան Արաբիայի, որը բավական բարձր մակարդակով է ներկայացված, ԱՄՆ-ի, Իսրայելի, Հարավային Կորեայի, Ճապոնիայի, բնականաբար՝ ԵվրԱզԷՍ-ի»,- ասել է Ղուկասյանը:
«Հուսով եմ, որ այդպիսի ֆորումների, երեւանյան ֆորումի արդյունքում, որին կմասնակցեն ռեալ ներդրողներ, նրանք կկարողանան ծանոթանալ այն նոր հնարավորություններին, որոնք Եվրասիական միությունը տրամադրում է: Նրանցից շատերը դրանց մասին լսել են, սակայն դեռեւս չեն հասկանում, թե դա ինչ է»,- հայտարարել է նա Հայ-մոսկովյան հումանիտար ֆորումի ժամանակ, որն անցկացվում է Ռուսաստանի մայրաքաղաքում:
«Ֆորումը նպաստում է երկկողմ ու բազմակողմ տնտեսական համագործակցությանը եւ ԵՏՄ, ԱՊՀ, BRIC-ի անդամ 5 երկրների միջեւ բովանդակալից բիզնես գործարքների իրականացմանը»,- ասել է նա: